पाकिस्तानमा हिन्दु विवाह विधेयक पारित

इस्लामाबादः पाकिस्तानको संसद्ले त्यहाँका अल्पसंख्यक हिन्दु धर्मावलम्बीले विवाह दर्ता गर्न पाउने विधेयक सर्वसम्मत रूपमा पास गरेको छ । निकै लामो समयदेखि प्रतीक्षा गरिएको विधेयक सोमबार पारित भएको हो ।

हिन्दु विधेयकको मस्यौदा पाकिस्तानी मानवाधिकारमन्त्री कामरान माइकलले त्यहाँको प्रतिनिधि सभा नेसनल एसेम्बलीमा पेस गरेका थिए । यस विधेयकले हिन्दु धर्मावलम्बीले बिहे गर्ने न्यूनतम उमेर १८ वर्ष तोकेको छ । पाकिस्तानमा अरू धर्मावलम्बीलाई विवाहका लागि न्यूनतम उमेर पुरुष १८ वर्ष हुनुपर्ने र महिला १६ वर्ष हुनुपर्ने व्यवस्था गरेको छ । यो नियम उल्लंघन गर्नेलाई ६ महिनाको जेल सजाय र ५ हजार पाकिस्तानी रुपैयाँ जरिवाना गरिेछ ।

पाकिस्तान मानवाधिकार आयोगकी प्रमुख जोहरा युसुफले यस विधेयकबाट हिन्दु महिला थप सुरक्षित हुने बताइन् । विवाह दर्ता गर्न पाएपछि महिलाका केही अधिकार सुनिश्चित हुने भएकाले यो खुसीको कुरा भएको बताइन् ।

यो कानुनमा हिन्दु महिलाले कतिपय अवस्थामा सम्बन्ध विच्छेद गर्ने अधिकारको व्यवस्था गरिएको छ । उक्त विधेयकमा हिन्दु धर्मावलम्बी श्रीमान् श्रीमती एक वर्ष वा त्योभन्दा बढी समय अलग रहेमा वा एकआपसमा एकसाथ बस्न नचाहेमा उनीहरूको सम्बन्ध विच्छेद हुन सक्छ ।

हिन्दु विधवाले श्रीमान् बितेको ६ महिना पुगेपछि पुनर्विवाह गर्न पाउने अधिकार पनि विधेयकले स्पष्ट पारेको छ । श्रीमती हुँदाहुँदै कुनै हिन्दुले दोस्रो विवाह गरेमा अपराध मानिनेछ र कारबाही गरिने छ । नेसनल एसेम्बलीले १० महिना लामो चर्चापछि उक्त विधेयक पारित गरेको हो । पाकिस्तानमा १.६ प्रतिशत हिन्दु धर्मावलम्बी छन् ।

यसअघि हिन्दुले विवाह दर्ता गर्न नपाउने भएकाले विधवाले श्रीमान्को सम्पत्ति पाउन गाह्रो हुने र हिन्दुका सन्तान सरकारी सुविधाबाट वञ्चित हुने गरेका थिए ।