दसैँपछि मेचीको ठूलो जलविद्युत काबेली ‘ए’ को निर्माण सुरु
ताप्लेजुङः मेची अञ्चलकै ठूलो जलविद्युत आयोजनाको रुपमा रहेको ३७ दशमलव ६ मेघावाट क्षमताकोे काबेली ‘ए’ जलविद्युत् आयोजनाको निर्माण कार्य अबको एक महिनामा सुरु हुने भएको छ ।
चिनियाँ कम्पनीले निर्माणको जिम्मा पाएको काबेली ‘ए’ जलविद्युत् आयोजना निर्माणको सम्पूर्ण प्रकृया पूरा भइसकेकाले आफूहरुले चाँडै काम सुरु गर्ने तयारी गरिरहेको आयोजनाका प्रवर्धक प्रदीपकुमार श्रेष्ठले बताए ।
ताप्लेजुङ र पाँचथरको सीमाक्षेत्रमा बग्ने काबेली नदीबाट विद्युत उत्पादन गर्ने तयारी गरिरहेको यो आयोजना निर्माणका लागि लगानीको समस्या नभएकाले तीन वर्ष भित्र काम सम्पन्न गर्ने लक्ष्य रहेको श्रेष्ठको भनाइ छ ।
झिझ्याङ, टीडब्लु र सीडब्लु नामक तीन ओटा चिनियाँ कम्पनीले निर्माणको जिम्मा पाएको यो आयोजना निर्माणको काम यसअघि काबेली हाइड्रोपावर इनर्जी प्रालीले सुरु गरेको थियो । तर उक्त कम्पनीले स्थानीय बासिन्दासँगको सम्झौता विपरित काम गरेको भन्दै स्थानीय बासिन्दाले विरोध जनाएपछि आयोजना निर्माण हुन सकेको थिएन ।
निर्माणको जिम्मा पाएको चिनियाँ कम्पनीले भने स्थानीयको सहभागितामा नै आयोजना निर्माण गर्ने योजना बनाएको छ ।
काबेली आयोजनामा पूर्वाधार निर्माणको काम भइरहेको छ । आयोजना प्रभावित क्षेत्रमा हाल धमाधम सडक निर्माणको कामलाई तिव्रता दिइएको छ । पाँचथरको अमरपुर र पञ्चमी, ताप्लेजुङको थेचम्बु र नाङखोल्याङ गाविसमा सडक निर्माणको काम अन्तिम चरणमा पुगिसकेको आयोजनाले जनाएको छ ।
यी गाविसहरु आयोजना प्रभावित क्षेत्रमा पर्छन् । अमरपुरका २ र ५ को खोला खर्कमा पोखरी बनाई साढे चार किलोमिटर सुरुङमार्गद्वारा अमरपुर ९ पिनासी घाटको पावर हाउसमा पानी खसाउने गरी पूर्वाधार निर्माणको काम भएको हो ।
बुटवल पावर कम्पनीको ५६ प्रतिशत र सिंगापुरको इन्फ्राको कम्पनीको ४४ प्रतिशत लगानीबाट उक्त आयोजनाको काम सुरु गरिएको हो । १० अर्बको लगानीमा आयोजना निर्माण गर्न लागिएको हो । स्थानीय बासिन्दासँग भएको सम्झौता बमोजिम अहिले विवादित विषय मिलाएर काम सुरु गरिएकोले सन् २०२० मा हाइड्रो निर्माणको कामले पूर्णता पाउने कम्पनीले जनाएको छ ।