नेपालको समूहमा तीन टोली
काठमाडौः कात्तिक १७ देखि ३० गतेसम्म मलेसियामा आयोजना हुने एएफसी सोलिडारिटी कप फुटबलमा नेपाली राष्ट्रिय फुटबल टोलीले पहिलो खेल टिमोर लिस्टेसँग खेल्ने भएको छ । एसियाली फुटबल महासंघ (एएफसी) ले आइतबार सार्वजनिक गरेका खेल तालिकाअनुसार नेपालले समूहको पहिलो खेलमा बंगलादेशसँग खेल्नु पर्ने थियो । तर आइतबार नै बंगलादेशले प्रतियोगिता नखेल्ने निर्णय गरेपछि नेपालले पहिलो खेलमा टिमोर लेस्टेलाई प्रतिद्वन्द्वीका रुपमा पाएको हो ।
सोलिडारिटी कपमा नेपाल समूह ‘ए' मा परेको छ । बंगलादेशले प्राविधिक कारण देखाउँदै भाग नलिने निर्णय गरेपछि समुहमा नेपालले एक खेल जितेमा सेमिफाइनल यात्रा पक्का हुनेछ । नेपालको समूहमा टिमोर लिस्टे र ब्रुनाई रहेका छन् ।
नेपालले समूहको पहिलो कात्तिक २० गते टिमोर लिस्टे र अन्तिम खेल कात्तिक २३ गते ब्रुनाईसँग खेल्नेछ । यसअघि नेपालकै समूहमा पाकिस्तानसमेत रहे पनि पाकिस्तानले प्राविधिक कारण देखाएर प्रतियोगितामा सहभागी नहुने निर्णय गरेको थियो ।
सात टोली सम्मिलित उक्त प्रतियोगिताको समूह ‘बी' मा श्रीलंका, लाओस, मकाउ र मंगोलियाबीच प्रतिस्पर्धा हुनेछ । लिग कम नकआउटका आधारमा खेलिने उक्त प्रतियोगितामा समूहका दुई उत्कृष्ट टोली सेमिफाइनलमा प्रवेश गर्नेछन् ।
सेमिफाइनल खेल कात्तिक २७ र फाइनल खेल कात्तिक ३० गते खेलिनेछ । एएएफसीले एएफसी च्यालेन्ज कप आयोजना गर्न छाडेपछि त्यसैको सट्टामा यस वर्षदेखि सोलिडारिटी कप आयोजना गर्न लागेको हो ।
एएफसीले सन् २०१८ को विश्वकप छनोट र सन् २०१९ को एसिया कप छनोट चरणबाट बाहिरिएका टोलीलाई सोलिडारिटी कोर्समा सहभागिता जनाउन लागेको हो । विश्वकप छनोटका लागि भएको प्रारम्भिक छनोट खेलमा नेपाल भारतसँग पराजित हुँदै बाहिरिएको थियो । नेपाली टोलीले करिब आठ महिनापछि औपचारिक प्रतियोगितामा सहभागिता जनाउन लागेको हो ।
नेपाली टोलीले आठ महिनाअघि बंगबन्धु गोल्ड कप र भारतको गुवाहाटीमा सम्पन्न १२ औं दक्षिण एसियाली खेलकुद (साग) को उपाधि जितेको थियो । दसैंको बिदापछि नेपाली टोलीले आइतबारदेखि नै सोलिडारिटी कोर्सका लागि अभ्यास सुरु गरेको छ ।
प्रतिक्रिया दिनुहोस !
