साइकल लेन भएको भए...
व्यस्त सडकमा कसैले साइकल चलाइरहेको देख्नासाथ मेरो मन सिरिंग हुन्छ र त्यही दुर्घटनाको सम्झना आउँछ । नसम्झूँ भन्दाभन्दै मनमा चित्र बनिहाल्छ । अनिझसंग हुन्छु म ।
त्यो दिन सधैंभन्दा फरक थियो । परिवारसँग घुम्न जाने साइत जुरेको थियो । सधैंजस्तो बिहानीपख अफिसको काम सकेर हतारहतार घर पुगेँ । घर पुग्दा निकै ढिलो भइसकेको थियो । ट्याक्सी तयार गरेर परिवार यात्रामा जान तम्तयार थिए । श्रीमती, छोरी र सासूआमालाई चन्द्रागिरि घुमाउने योजना बल्ल सफल हुँदै थियो । घुमघामपछि हतारहतार कार्यकक्ष पुग्नुपर्ने बाध्यताले पनि पिरोलिरहेको थियो ।
ड्राइभर दाइसँगै बसेर यात्रारत थिएँ । हामी चढेको ट्याक्सी सानेपाको स्टार हस्पिटलनजिकै पुग्दै गर्दा एक्कासि अगाडि दौडिरहेको साइकल यात्रीसँग ठोक्किन पुग्यो । कसरी त्यस्तो हुन पुग्यो ठ्याक्कै भन्न सक्दिनँ । भाइ भाइ भनेर ती साइकल यात्रीलाई बोलाउँदा बोलाउँदै दुर्घटना भइहाल्यो ।
साइकलमा सवार व्यक्ति दुई बल्ड्याङ खाएर सडकपेटीमा पछारिन पुगे । हामी चढेको ट्याक्सीको सिसा झर्याम्म फुट्यो । यसो हेरेँ, धन्न पछाडि बसिरहेका छोरी, श्रीमती र सासूआमा सुरक्षित हुनुहुन्थ्यो ।
कति बेला घाइतेसामु पुगेँ आफैंलाई थाहा भएन । एक्कासि निधारमा पेस्तोल तेर्सिएपछि झल्याँस्स भएँ । प्रहरी पोसाकमा रहेका घाइते मलाई पेस्तोल तेस्र्याइरहेथे ।
'तैं होस् ड्राइभर ? ' उनी आक्रोशित देखिन्थे । हतास भइसकेको मैले हतारहतार परिवारलाई घर फर्काएँ । भीड जम्मा भइसकेको थियो । सबैजना ड्राइभर कुट्न तम्तयार देखिन्थे । भीडबाट जोगाउन पनि ड्राइभरलाई नजिकैको प्रहरीचौकीमा पठाएँ । धन्न, घाइते व्यक्ति समझदार रहेछन् । आक्रोशित भीडलाई उनैले साम्य पारे । एक राजनीतिक व्यक्तिका सुरक्षागार्ड रहेछन् उनी । सौहार्द वातावरण निर्माण गर्न बलियो भूमिका खेले । आवश्यक उपचारपछि ड्राइभर र उनीबीच मिलापत्र भई घटना टुंगियो ।
घटना विगत भइसकेको छ । मेरो मनमा भने अझै पनि ताजा बनेर नाचिरहेछ । सोच्छु— साइकल यात्रीका लागि छुट्टै साइकल लेन भइदिएको भए त्यो घटना हुने थिएन । साइकल यात्रीले पनि स्वतन्त्रतापूर्वक यात्रा गर्न पाउँथे ।
संसारका विकसित सहरहरूमा साइकल यात्रीका लागि बेग्लै साइकल लेन बनाइएको हुन्छ । बढ्दो प्रदूषण, ग्लोबल वार्मिङ आदिका कारण पनि साइकललाई प्राथमिकता दिन थालिएको छ । हाम्रै देशमा पनि अघिल्ला प्रधानसेनापति गौरवशमशेर राणाले साइकलमै अफिस आउनेजाने गर्न जोड दिएका थिए ।
तर, साइकलमात्रै भएर साइकल सवारी हुँदैन । साइकल सवारीका लागि सडक पनि साइकलमैत्री हुनुपर्छ । विडम्बना ! अन्तर्राष्ट्रिय स्तरको भनिएको सडकमा पनि साइकल लेनको बन्दोबस्त छैन । मानौं, साइकलमा हिँड्नु अपराध हो । सडक भनेकै पेट्रोल र डिजेलबाट चल्ने सवारीसाधनका लागि हो ।
नाकाबन्दीको समयमा साइकल चढेर हिँड्छौं भनेर भाषणबाजी गरिए पनि साइकलमैत्री सडकको परिकल्पना नहुनु दुखद हो । मिनेटभरमा सयौं सवारीसाधन गुड्ने काठमाडौंको सडकमा साइकल लिएर हिँड्नु जोखिम प्रतीत हुन्छ ।
जबजब महानगरको भीडमा च्यापिएर कसैले साइकल चलाउँदै गरेको देख्छु, मेरो मन सिरिंग हुन्छ ।
प्रतिक्रिया दिनुहोस !
