अस्ट्रेलियाको केही लागेन दक्षिण अफ्रिकासँग

पर्थः दक्षिण अफ्रिकाविरुद्धको पहिलो टेस्ट क्रिकेटमा घरेलु टोली अस्ट्रेलिया रक्षात्मक स्थितिमा देखिएको छ । पाँच सय ३९ रनको लक्ष्य पछ्याएको अस्ट्रेलियाले चौथो दिन आइतबारको खेल समाप्त हुँदासम्म चार विकेट गुमाएर एक सय ६९ रन जोडेको छ । एक दिनको खेल बाँकी रहँदा ६ विकेट साथमा रहेको अस्ट्रेलियालाई जितका लागि अझै तीन सय ७० रन आवश्यक छ ।

टेस्ट क्रिकेटमा हालसम्म बढीमा चार सय १८ रनको लक्ष्य पूरा भएको कीर्तिमान छ । यसैगरी टेस्ट क्रिकेटमा हालसम्म चार पटकमात्र चार सयभन्दा बढी रनको विजयलक्ष्य पूरा भएको छ । अस्ट्रेलियाले भने टेस्ट क्रिकेटमा दोस्रो पालीमा बढीमा चार सय ६ रन जोडेको छ । सन् २००९ मा इङ्ल्यान्डविरुद्ध पाँच सय २२ रनको लक्ष्य पछ्याउने क्रममा अस्ट्रेलियाले उक्त योगफल बनाएको थियो ।

अस्ट्रेलियाको दोस्रो पालीमा डेभिड वार्नर ३५, कप्तान स्टिभन स्मिथ ३४, सन मार्स १५ र एडम भोग्स एक रन जोेडेर आउट भए । उस्मान ख्वाजा ५८ र मिचेल मार्स १५ रनमा अविजित छन् । यी दुई ब्याट्सम्यानबीच २३ रनको साझेदारी भएको छ । दक्षिण अफ्रिकाका बलर कागिसो राबडा एक्लैले तीन विकेट लिए । डेभिड वार्नर रनआउट भएका थिए ।

टोलीले ५२ रन जोड्दा वार्नर पहिलो विकेटका रूपमा आउट भएका थिए । सोही स्थितिमा दोस्रो विकेट गुमाएको अस्ट्रेलियाले तेस्रो विकेटका लागि ९२ रनको साझेदारी गरेको थियो । यसअघि दक्षिण अफ्रिकाले पहिलो पाली आठ विकेटको क्षतिमा पाँच सय ४० रन जोडेर समाप्तिको घोषणा गरेको थियो । दक्षिण अफ्रिकाले ६ विकेटको क्षतिमा तीन सय ९० रनको स्थितिबाट चौथो दिन आफ्नो दोस्रो पाली अगाडि बढाएको थियो ।

आइतबार भेर्नन फिलान्डर ७३ र विकेटकिपर क्विन्टन डे कोक ६४ रन बनाएर आउट भए । केशव महाराज ४१ रनमा अविजित रहे । दक्षिण अफ्रिकाले सातौं विकेटका लागि एक सय १६ रनको साझेदारी गरेको थियो । भ्रमणकारी टोलीले आठौं विकेटका लागि पनि ७२ रनको साझेदारी गरेको थियो । अस्ट्रेलियाका बलर जोस हेजलउड, पिटर सिडल र मिचेल मार्सले दुईदुई विकेट लिए । स्टिभन स्मिथ र मिचेल स्टार्कले पनि एकएक विकेट हात पारे ।

दक्षिण अफ्रिकाका लागि दोस्रो पालीमा प्रारम्भिक ब्याट्सम्यान डिन एल्गरले एक सय २७ रन र जेपी डुम्नीले एक सय ४१ रनको योगदान गरेका थिए । एल्गर र डुम्नी दुवैको पाँचौं टेस्ट शतक हो । ४५ रनमा दुई विकेट गुमाएको अवस्थामा एल्गर र डुम्नीले दुई सय ५० रनको साझेदारी गरेका थिए ।

यसअघि टस जिती पहिले ब्याटिङ गरेको दक्षिण अफ्रिका आफ्नो पहिलो पालिमा दुई सय ४२ रनमै समेटिएको थियो । अस्टे«लियाले पनि आफ्नो पहिलो पालिमा दुई सय ४४ रनमात्र बनाउन सकेको थियो ।