लेस्टरलाई वेस्ट ब्रोमबिचको धक्का

लन्डनः इङ्लिस प्रिमियर लिग फुटबलमा आर्सनलले अंक तालिकाको शीर्ष स्थानमा उक्लने अवसर गुमाएको छ । आइतबार भएको खेलमा टोट्टनहामसँग १-१ गोलको बराबरीमा रोकिएपछि दुई स्थान माथि उक्लँदै तालिकाको शीर्ष स्थानमा पुग्ने आर्सनलको प्रयास सफल हुन सकेन । आर्सनलको मैदानमा भएको खेलमा सुरुआती अग्रता घरेलु टोलीले लिएको थियो । टोट्टनहामका केभिन विमरबाट ४२ औं मिनेटमा आत्मघाती गोल भएको थियो ।

तर दोस्रो हाफमा टोट्टनहाम बराबरीमा फर्कियो । ह्यारी केनले ५१ औं मिनेटमा पेनाल्टीमार्फत गोल गरेका थिए । बराबरीपछि ११ खेलबाट २४ अंक भएको आर्सनल तेस्रो स्थानमा छ । शीर्ष स्थानमा रहेको चेल्सीले ११ खेलबाट २५ अंक जोडेको छ । दोस्रो स्थानमा रहेको म्यानचेस्टर सिटीको ११ खेलबाट २४ अंक छ । आर्सनल सबै प्रतियोगितामा गरि १५ खेलयता अपराजित रहेको छ । टोट्टनहाम ११ खेलबाट २१ अंक जोडेर पाँचौं स्थानमा छ ।

यस अघि शनिबार राती भएको खेलमा जित हात पार्दै चेल्सी इङ्लिस प्रिमियर लिग तालिकाको शीर्ष स्थानमा उक्लिएको छ । चेल्सीले एकपक्षीय खेलमा एभर्टनलाई ५-० गोलको फराकिलोअन्तरले हरायो । एभर्टनविरुद्घ एकपक्षीय प्रदर्शन गरेको चेल्सीको सजिलो जितमा इडेन हाजार्डले दुई गोलको योगदान गरे ।

१९ औं मिनेटमा खाता खोलेका हाजार्डले ५७ औं मिनेटमा अर्को गोल थपेका थिए । पहिलो हाफमै ३-० को अग्रता लिएको चेल्सीका लागि दोस्रो गोल २० औं मिनेटमा मार्कोस एलोन्सोले गरेका थिए । ४२ औं मिनेटमा डिएगो कोस्टाले तेस्रो गोल थपेका थिए । पेड्रो रोड्रिग्वेजले ६५ औं मिनेटमा पाँचौं गोल गरेपछि चेल्सीले फराकिलो जित आत्मसात् गरेको थियो । १८ अंक बनाएको एभर्टन भने छैटौं स्थानमा छ ।

अर्को खेलमा मिडिल्सब्रोसँग १-१ गोलको बराबरीमा रोकिएपछि म्यानचेस्टर सिटीको शीर्ष स्थान कब्जा गर्ने योजना असफल बनेको छ । प्रतिस्पर्धात्मक खेलमा म्यान सिटीले सुरुआती अग्रता लिए पनि अन्तिमसम्म सम्हालिन सकेन । म्यान सिटीका लागि सिर्जियो एग्वेरोले ४३ औं मिनेटमा गोल गरेका थिए । दोस्रो हाफमा रक्षात्मक रणनीति अपनाएको म्यान सिटीले खेलको अन्तिमा पुगेर अग्रता गुमाएको हो । मिडिल्सब्रोका लागि ९० औं मिनेटमा मार्टिन डे रोनले जवाफी गोल गरेका थिए । मिडिल्सब्रो भने ११ अंकसहित तालिकाको १४ औं स्थानमा छ ।

बनर्लीले क्रिस्टल प्यालेसलाई ३-२ गोलले स्तब्ध बनायो । बर्नलीको जितमा साम भोक्सले दोस्रो मिनेटमै खाता खोलेका थिए । दोस्रा गोल १४ औं मिनेटमा जोहान बर्ग गुडमन्डसनले गरे । ९० औं मिनेटमा आस्ले बर्नेसले तोस्रो गोल गर्दै टोलीको जित सुनिश्चित पारे । बर्नलीलाई खेलभर टक्कर दिएको क्रिस्टल प्यालेसका लागि भने ६० औं मिनेटमा कोनोर विकहाम र ८१ औं मिनेटमा क्रिस्टियन बेनटेक (पेनाल्टीमार्फत) ले गोल गरे । १४ अंकसहित बर्नली तालिकाको नवौं स्थानमा छ । क्रिस्टल प्यालेस ११ अंकसहित १५ औं स्थानमा छ ।

अर्को खेलमा स्टोक सिटी र वेस्टहाम युनाइटेडले १-१ गोलको बराबरी खेल्दै अंकमा बाँडे । वेस्टहामले ६५ औं मिनेटमा अग्रता लियो । स्टोक सिटीका ग्लेन वेलनबाट आत्मघाती गोल भएपछि वेस्टहाम अगाडि बढेको थियो । स्टोक सिटीले ७५ औं मिनेटमा बराबरी गोल फर्कायो । स्टोक सिटीका लागि बोजन किर्किकले गोल गरेका थिए ।

१३ अंकसहित स्टोक सिटी ११ औं स्थानमा छ । ११ अंक बनाएको वेस्टहाम १६ औं स्थानमा छ । अर्को खेलमा रेलिगेसन क्षेत्रमा रहेको सन्डरल्यान्डले बर्नमाउथलाई २-१ गोलले हरायो । लिगमा पहिलो जित हात पारेको सन्डरल्यान्ड पाँच अंकसहित तालिकाको अन्तिम स्थानमा छ । १२ अंकसहित बर्नमाउथ १२ औं स्थानमा छ ।