फाइनलमा मध्यमाञ्चलको प्रतिद्वन्द्वी एपीएफ
काठमाडौंः प्रधानसेनापति चौथो अन्तर्राष्ट्रिय महिला फुटबल प्रतियोगिताको उपाधिका लागि मध्यमाञ्चल र विभागीय टोली एपीएफ भिड्ने भएका छन् । सोमबार भएको आआफ्नो सेमिफाइनल खेलमा जित हात पार्दै मध्यमाञ्चल र एपीएफले उपाधि भेट पक्का गरेका हुन् । फाइनल खेल बुधबार हुनेछ ।
ललितपुरको लगनखेलस्थित सैनिक शारीरिक तालिम तथा खेलकुद केन्द्रको मैदानमा विभागीय टोली त्रिभुवन आर्मीलाई टाइब्रेकरमा ३-१ गोलले पराजित गर्दै मध्यमाञ्चलले फाइनल यात्रा तय गरेको हो । एपीएफले भने अर्काे विभागीय टोली नेपाल पुलिस क्लबलाई निर्धारित ९० मिनेटको खेलमै ३-१ गोल अन्तरले पराजित गर्दै फाइनलमा मध्यमाञ्चलसँगको भेट पक्का गरेको हो ।
आर्मी र मध्यमाञ्चलबीचको निर्धारित समयको खेल २-२ को बराबरीमा रोकिएपछि निर्णयार्थ टाइब्रेकर प्रहार गरिएको थियो । मध्यमाञ्चलका लागि निशा ठकुरी, अञ्जु लोप्चन र मनीषा रावतले गोल गर्दै जित पक्का बनाएका थिए ।
आर्मीका लागि भने कृष्णा खत्रीले मात्रै गोल गरेका थिए । त्यसअघि निर्धारित समयको खेलमा आर्मीले सुरुआती अग्रता लिएर पनि जित हात पार्न सकेन । आर्मीलाई खेलको ३२औं मिनेटमा गोल गर्दै शर्मिला थापामगरले १-० ले अघि बढाएका थिए ।
तर मध्यमाञ्चलले ४२औं मिनेटमा बराबरी गोल फर्कायो । अस्मिता सिंहले मध्यमाञ्चललाई १-१ को बराबरीका लागि गोल गरेकी थिइन् । खेलको ६३औं मिनेटमा अञ्जु लोप्चनले गोल गरेपछि मध्यमाञ्चलले खेलमा २-१ को अग्रता बनाएको थियो । त्यसपछि खेलको ९०औं मिनेटमा आर्मीकी अञ्जली वाइबाले गोल गरेपछि निर्धारित समयको खेल २-२ को बराबरीमा टुंगिएको थियो ।
अर्को खेलमा भने एपीएफले सशक्त प्रदर्शनसहित जित हात पार्यो । एपीएफलाई खेलको आठौं मिनेटमा गोल गर्दै सरु लिम्बूले १-० ले अघि राखेकी थिइन् । त्यसपछि खेलको ४८औं मिनेटमा गीता रानामगरले एपीएफको अग्रता २-० मा पुर्याइन् । खेलको ७८औं मिनेटमा नीरू थापाले गोल गर्दै पुलिसलाई खेलमा फर्काउने प्रयास गरेकी थिइन् । तर, खेलको अतिरिक्त समयमा सबिता भण्डारीले अर्को गोल थपेपछि एपीएफ ३-१ ले विजयी बन्यो ।
प्रतिक्रिया दिनुहोस !
