नेपाल विजेता बन्दै सेमिफाइनलमा

काठमाडौः नेपाल मलेसियामा जारी ‘एएफसी सोलिडारिटी कप फुटबल प्रतियोगिता' को सेमिफाइनलमा प्रवेश गरेको छ । मलेसियाको कुचिङस्थित नेगेरी स्टेडियममा मंगलबार भएको समूहगत चरणको आफ्नो दोस्रो तथा अन्तिम खेलमा नेपालले ब्रुनाईलाई ३-० गोलले हराउँदै सेमिफाइनलमा पुगेको हो ।

नेपालले ब्रुनाईसँग १० वर्षअघिको हारको बदलासमेत लिएको हो । समूह एमा नेपालले दुई खेलबाट चार अंक जोड्यो । उपविजेता हुँदै सेमिफाइनल पुगेको ब्रुनाईले दुई खेलबाट तीन अंक बटुल्यो ।

यसअघि नेपाल र ब्रुनाईबीच सन् २००६ को एएफसी च्यालेन्ज कपमा भिडन्त भएको थियो । समूहगत चरणकै उक्त खेलमा नेपाल ब्रुनाईसँग २-१ गोलले पराजित भएको थियो । त्यतिबेला नेपालका लागि टासी छिरिङले गोल गरेका थिए । यसपटक ब्रुनाईविरुद्ध तीनवटै गोल स्ट्राइकरले गरे ।

नेपाली अग्रपंक्ति सम्हालेका विमल घर्तीमगर, नवयुग श्रेष्ठ र भरत खवास गोल गर्न सफल भएका हुन् । खेलको सुरुआतदेखि नै ब्रुनाईविरुद्ध आक्रामक शैलीमा उत्रिएको नेपालले पहिलो हाफको इन्जुरी समयमा खाता खोलेको थियो ।

नेपालका लागि पहिलो गोल नवयुगले गरे । हेमन्त गुरुङले डीबक्स बाहिरबाट गरेको सशक्त प्रहार ब्रुनाईका रक्षकले क्लियर गर्ने प्रयास गरे पनि बल नजिकै रहेका नवयुगको खुट्टामा पुगेको थियो । नवयुगको पहिलो प्रहार विपक्षी गोलरक्षकले रोक्ने प्रयास गरे पनि उनी आफैंले रिबाउन्डमा गोल गर्दै नेपालको खाता खोले । १-० को अग्रतापछि थप जोसिएको नेपालले दोस्रो हाफमा उत्कृष्ट खेल पस्कियो ।

खेलको ७२ औं मिनेटमा भरत खवासले गोल गर्दै टोलीको उत्साह थप बढाएका थिए । विमल घर्तीमगरले प्रहार गरेको कर्नरमा सुजल श्रेष्ठले हेडमार्र्फत दिएको बललाई भरतले पहिलो टचमै आकर्षक रूपमा जाली चुमाएका थिए ।

लगत्तै ब्रुनाईको कडा प्रहारलाई नेपालका रक्षक रविन श्रेष्ठले विफल पारदिएका थिए । नेपालले ८० औं मिनेटमा पेनाल्टीमार्फत तेस्रो गोल गरेको थियो । नेपालका लागि तेस्रो गोल विमल घर्तीमगरले गरे ।

ब्रुनाईका खेलाडीले विमललाई डीबक्सभित्र जर्सीमा तानेर लडाएपछि पाएको पेनाल्टीलाई उनले नै सदुपयोग गरे । पहिलो हाफमा केही अवसर बनाएको ब्रुनाई दोस्रो हाफमा भने निराश देखिएको थियो ।

समूहमा नेपाल पहिलो खेलमा टिमोर लिस्टेसँग गोलरहित बराबरीमा रोकिएको थियो । यसअघि नै सेमिफाइनलमा स्थान बनाएको ब्रुनाई तीन अंकका साथ समूह उपविजेता बन्यो । ब्रुनाईले पहिलो खेलमा टिमोर लिस्टेलाई ४-० गोलले हराएको थियो । ।

सेमिफाइनलमा नेपालको प्रतिद्वन्द्वी तय भइसकेको छैन । नेपालले मंगोलिया, लाओस र मकाउमध्ये एकसँग प्रतिस्पर्धा गर्नेछ । नेपालको सेमिफाइनल कात्तिक २७ गते हुनेछ । खेलपछि नेपालका प्रशिक्षक ग्योतुकी कोजीले खेल जिते पनि खेलाडीको प्रदर्शनबाट आफू सन्तुष्ट नरहेको बताए । ‘अस्तिको भन्दा आजको मैदान धेरै राम्रो थियो । खेलाडीले सोचेको जस्तो खेल्न सकेनन् ।

सेमिफाइनलमा पुगेकाले आगामी खेलमा आजको भन्दा थप राम्रो गर्नेछौं', कोजीले भने । नेपालका कप्तान विराज महर्जनले भने टोलीका सबै खेलाडीले मेहनत गरेर खेलेको प्रतिक्रिया दिए । ‘पहिलो खेलमा गोल गर्न नसक्दा दुःख लागेको थियो । आज सबैले ईख लिएर खेल्यौं,' विराजले भने ।

ब्रुनाईका प्रशिक्षक कोन ओहसोनले टोलीका महत्वपूर्ण खेलाडी घाइते हुँदा राम्रो खेल्न नसकेको बताए । ‘हाम्रो ६ जना खेलाडी घाइते थिए । रक्षापंक्तिको कमजोरीका कारण हामीले गोल खाएका हौं । सेमिफाइनलमा पुगिसकेकाले खेलाडी बढी आत्मविश्वासी भए । यस हारले हाम्रो टोलीलाई थप सचेत गराएको छ । सेमिफाइनलमा हामी राम्रो गरेर देखाउनेछौं,' कोनले भने ।

आठ महिनापछि तेस्रो औपचारिक प्रतियोगिताका रूपमा सोलिडारिटी कप खेल्न मलेसिया गएको नेपाली टोली लगातार तेस्रो प्रतियोगिताको उपाधि जित्ने लक्ष्यमा छ । फाइनल खेल कात्तिक ३० गते खेलिनेछ ।

एएफसीले एएफसी च्यालेन्ज कप आयोजना गर्न छाडेपछि त्यसैको सट्टामा यस वर्षदेखि सोलिडारिटी कप आयोजना गर्न लागेको हो । एएफसीले सन् २०१८ को विश्वकप छनोट र सन् २०१९ को एसिया कप छनोट चरणबाट बाहिरिएका टोलीलाई सोलिडारिटी कपमा सहभागी गराउन लागेको हो ।

विश्वकप छनोटका लागि भएको प्रारम्भिक छनोट खेलमा नेपाली टोली भारतसँग पराजित हुँदै बाहिरिएको थियो । नेपाली राष्ट्रिय टोलीले आठ महिनापछि औपचारिक प्रतियोगितामा सहभागिता जनाउन लागेको हो ।

नेपालले आठ महिनाअघि बंगलादेशको ढाकामा सम्पन्न बंगबन्धु गोल्डकप र भारतको गुवाहाटीमा सम्पन्न १२ औं दक्षिण एसियाली खेलकुद (साग) को उपाधि जितेको थियो ।