मड्रिड डर्बीमा रोनाल्डोको ह्याट्रिक, बार्सिलोना बराबरीमा रोकियो

काठमाडौंः क्रिष्टियानो रोनाल्डोको ह्याट्रिकको मदतमा मड्रिड डर्बीमा रियल मड्रिडले जित हात पारेको छ।

ला लिगा अन्तर्गत गएराति भएको मड्रिड डर्बीमा रोनाल्डोले ह्याट्रिक गरेपछि रियल मड्रिडले एथ्लेटिको मड्रिडलाई ३–० ले हरायो। एथ्लेटिको मड्रिडको घरेलु मैदानमा भएको खेलमा रियल मड्रिडले सानदार प्रदर्शन गर्यो।

खेलको २३ औं मिनेटमा रोनाल्डोले गोल गर्दै रियल मड्रिडलाई सुरुवाती अग्रता दिलाए। पहिलो हाफमा १–० को अग्रता दिलाएको रियल मड्रिडले दोस्रो हाफमा दुई गोल गर्यो।

खेलको ७१ औं मिनेटमा रियल मड्रिडले पेनाल्टीको अबसर पायो, र त्यसमा रोनाल्डो चुकेनन्। पेनाल्टीमार्फ व्यक्तिगत तथा टोलीका लागि दोस्रो गोल गरेका रोनाल्डोले खेलको ७७ औं मिनेटमा गोल गर्दै ह्याट्रिक पूरा गरे। खेल अबधिभर रियल मड्रिडले एथ्लेटिको मड्रिडका खेलाडीलाई खुलेर खेल्न दिएन।

गएराति नै भएको अर्को खेलमा बार्सिलोना मालागासँग गोलरहित बराबरीमा रोकियो। बार्सिलोना लियोनल मेसीबिनै मैदान उत्रिएको थियो। मेसीको अनुपस्थिति नै बार्सिलोनाका लागि घातक बन्यो।

मड्रिड डर्बीमा ३–० को जित निकालेको रियल मड्रिड १२ खेलबाट ३० अंकका साथ तालिकाको शीर्ष स्थानमा उक्लिएको छ भने बराबरीमा रोकिएको बार्सिलोनाको समान खेलबाट २६ अंकका साथ दोस्रो स्थानमा छ। एथ्लेटिको मड्रिड भने समान १२ खेलबाट २१ अंकका साथ लिग तालिकाको पाँचौ स्थानमा छ।