सुन्दरताको खोजीमा कविता

नवीन प्राचीन, युवा कवि

फुटकर कविता लेख्नु र किताब निकाल्नुले एउटा कविलाई कत्तिको फरक पार्दो रहेछ ?
कविका रूपमा व्यक्तिगत महशुस त उस्तै हो । सामाजिक स्वीकार्यताको हिसाबले भने कृति प्रकाशनले केही सहज महशुस गराउँदो रहेछ ।

अंग्रेजी अनुवादसहित हुँदा किताब पढ्ने पाठक र आउने प्रतिक्रिया कत्तिको फरक पर्दो रहेछ ?
अंग्रेजी र नेपाली दुवै अथवा दुईमध्ये एकको मात्रै पहुँच भएकासमेत गरेर तीनथरी प्रतिक्रिया लिने अवसरले कविताप्रतिको बहु–दृष्टिकोण बुझ्ने अवसर अनुवादले प्रदान गर्दो रहेछ ।

तपाईंको संग्रह ‘उभिएर एक्लै’भित्रका कविताले एक्लै उभिन प्रेरित गर्छ कि समूह खोज्छ ?
व्यक्तिगत रूपमा मलाई कविताले आफ्नो सत्वमा कहिले नितान्त एक्लै उभिन आँट प्रदान गर्छ भने आवश्यकताको क्षणमा सामूहिक उद्देश्य प्राप्तिमा विलय हुने सहजता पनि प्रदान गर्छ । सिर्जनामा सर्जकको भोगाइको धेरथोर प्रभाव रहने सत्यलाई स्वीकार्ने हो भने ‘उभिएर एक्लै’ भित्रका कवितामा पनि यी दुवैको मिश्रण भेटिएला ।

कविता कसलाई सम्बोधन गर्न लेख्नुहुन्छ ?
सर्वप्रथम त आफ्नै आवेग, संवेग र विचारहरूलाई होला । कविता किताबको सार्वजनिकीकरण पछिचाहिँ आफूजस्तै भावना भएको अर्को कसैलाई ।

तपाईंको पुस्ता किन कविता लेखिरहेको छ ?
जीवन र समाज अझै सुन्दर, सहज, न्यायिक र समावेशी बनाउन ।