माउरिन्होले भने,‘मेसीले बार्सिलोना छोड्दैनन् र करियरै त्यहीँबाट अन्त्य गर्छन्’

काठमाडौंः अर्जेन्टिनी स्टार खेलाडी लियोनल मेसीले स्पेनिस क्लब बार्सिलोना छोड्ने हल्ला चलिरहेका बेला म्यानचेस्टर युनाइटेडका पोचुगिस् प्रशिक्षक जोसे माउरिन्होले भने मेसीले बार्सिलोना कहिल्यै नछोड्ने दाबी गरेका छन्।

पछिल्ला वर्षमा मेसीले बार्सिलोना छोड्ने हल्ला चल्दै आएको भन्दै माउरिन्होले मेसीले बार्सिलोनाबाटै आफ्नो करियर अन्त्य गर्ने विश्वास व्यक्त गरेका हुन्।

माउरिन्होले भनेका छन्,‘लियोनल मेसीबारे प्रत्येक सिजन यस्तै हल्ला चल्दै आएका छन्। उनले बार्सिलोना छोड्न लागे, छोड्छन् भन्ने कुरा चर्चामा आउँछ। तर, यो अहिलेसम्म छोडेका छैनन् र मेसीले बार्सिलोना कहिल्यै छोड्ने छैनन, म यसमा विश्वस्त छु।’

मेसी बार्सिलोनाका लागि र बार्सिलोनाका लागि मेसी आवश्यक रहेको भन्दै माउरिन्होले भने,‘मलाई विश्वास छ, मेसीले छोड्दैनन र करियरै यहीबाट टुंग्याउँछन्।’

लियोनल मेसीको बार्सिलोनासँग सन् २०१८ सम्म छ। तर, मेसीले यो सिजनको अन्तिममा बार्सिलोना छोड्ने चर्चा चलिरहेको छ। मेसीलाई भित्र्याउन इग्लिस क्लब म्यानचेस्टर सिटीले प्रस्ताव लैजाने तयारी समेत गरेको बताइएको छ।