नेपाली टोलीको खराब प्रदर्शन
काठमाडौंः नेपाली राष्ट्रिय महिला क्रिकेट टोलीले अन्तर्राष्ट्रिय टीट्वेन्टी क्रिकेटमा हालसम्मकै खराब प्रदर्शन गरेको छ । नेपाली क्रिकेट टोलीले थाइल्यान्डमा जारी एसीसी एसिया कपअन्तर्गत आफ्नो दोस्रो खेलमा सोमबार श्रीलंकाविरुद्ध केवल २३ रनको योगफल खडा गर्यो । उक्त योगफल अन्तर्राष्ट्रिय क्रिकेटमा नेपाली टोलीको बनाएको हालसम्मकै सबैभन्दा कम योगफल हो ।
यसअघि अन्तर्राष्ट्रिय टीट्वेन्टी क्रिकेटमा नेपाली टोलीको बनाएको सबैभन्दा कम योगफल २६ रनको थियो । सन् २०१४ मा दक्षिण कोरियाको इन्चोनमा सम्पन्न एसियाली खेलकुदअन्तर्गत बंगलादेशविरुद्धको खेलमा नेपाली महिला टोली २६ रनमै समेटिएको थियो ।
त्यसबेला नेपाली टोलीले १५.२ ओभर खेल्दा आफ्नो सबै विकेट गुमाएको थियो । यस पटक १६.२ ओभरमा नेपालले सबै विकेट गुमायो । नेपाली टोली श्रीलंकासँग आठ विकेटले पराजित भयो । श्रीलंकाले ४.३ ओभरमा केवल दुई विकेट गुमाएर जित पक्का गरेको थियो ।
लगातार दोस्रो पराजय बेहोरेको नेपालको फाइनल खेल्ने सम्भावनासमेत निकै कमजोर बनेको छ । शनिबार भएको आफ्नो पहिलो खेलमा पाकिस्तानसँग नौ विकेटले पराजित भएको नेपाल लगातार दोस्रो पराजयसँगै ६ टोली सम्मिलित प्रतियोगिताको अंकतालिकामा पुछारमा पुगेको छ ।
श्रीलंकाली टोलीविरुद्ध टीट्वेन्टी ढाँचाको क्रिकेटमा नेपालको यो लगातार दोस्रो पराजय हो । यसअघि सन् २०१२ मा चीनमा भएको एसियाली खेलकुदअन्तर्गत भएको प्रतिस्पर्धामा नेपाललाई श्रीलंकाले २० रनले पराजित गरेको थियो । त्यसबेला ७९ रनको लक्ष्य पछ्याएको नेपाली टोलीले निर्धारित ओभरमा नौ विकेट गुमाउँदै ५८ रनमात्र बनाउन सकेको थियो । नेपालले चार वर्षअघिको त्यही प्रदर्शनलाई समेत कायम राख्न सकेन ।
थाइल्यान्डको बैंककमा भएको खेलमा नेपाली टोलीले अन्य दुई खराब कीर्तिमानसमेत बनाएको छ । अन्तर्राष्ट्रिय टीट्वेन्टी क्रिकेटमा पहिलो पटक एकै पालीमा सात नेपाली खेलाडी डक आउट भए भने नेपालले एउटा पनि चौका वा छक्का प्रहार गर्न सकेन । टस हारी पहिले ब्याटिङमा आएको नेपालका लागि सुरुआती ब्याट्सउमन ज्योति पाण्डेले १६ रन जोड्दै अघि बढाउने प्रयास गरेकी थिइन् ।
तर त्यसपछिका कुनै पनि खेलाडीले गतिलो प्रदर्शन गर्न नसकेपछि नेपाली टोली प्रतियोगितामा लज्जास्पद हार व्यहोर्न बाध्य बन्यो । नेपालका लागि ज्योतिबाहेक अर्की सुरुआती ब्याट्स उमन सीता रानामगरले चार र कप्तान रुविना क्षेत्रीले एक रन जोडे ।
अन्य खेलाडीले भने रन जोड्न सकेनन् । काजल श्रेष्ठ, नेरी थापा, इन्दु बर्मा, रश्मि चौलागाईं, करुणा भण्डारी, सरिता मगर र शवनम राई शून्य रनमै पभेलियन फर्किए । नेपालकी अन्तिम ब्याट्उमन सरस्वतीकुमारी चौधरी पनि शून्य रनमै अविजित रहिन् ।
श्रीलंकाका सुगन्धिका कुमारी र इनोका रानाविराले तीनतीन विकेट लिइन् । ओशादी रणसिंघेले पनि दुई विकेट लिइन् । श्रीलंकाका लागि हसिनी पेरेराले अविजित १७ रनको योगदान गरिन् । नेपालकी रुविना र करुणाले श्रीलंकाको एकएक विकेट लिएका थिए । नेपाललाई पराजित गरेको श्रीलंका अंकतालिकाको तेस्रो स्थानमा आसीन छ ।
खेल सुरु हुनुअघि श्रीलंकाली टोलीकी कप्तानसँग मायाको चिनो साटासाट गर्दै नेपाली टोलीकी कप्तान रुविना क्षेत्री (दायाँ)सौजन्यः रमन सिवाकोटी
प्रतिक्रिया दिनुहोस !
