श्रद्धाञ्जलि दिन समर्थककाे अाेइराे

रियो दी जेनेरियोः कोलम्बियामा मंगलबार भएको विमान दुर्घटनामा परी चापेकोन्स क्लबका १९ जना खेलाडीसहित ७६ जनाको मृत्यु भएपछि ब्राजिलियन सहर चापेकोन्स शोकमा डुबेको छ ।

हजारौंको संख्यामा आफन्त, समर्थक, खेलप्रेमी र क्लबका पदाधिकारीले बुधबार स्थानीय चर्च र रंगशालामा पुगेर मृतक आत्माको चिरशान्तिको कामना गरेका छन् । उनीहरूले चापेकोन्स क्लबका अफिसियल र समर्थकले हरियो—सेतो रङको जर्सी लगाएका थिए ।

उक्त दुर्घटनामा परेका ६ जनाको जीवितै उद्धार गरिए पनि एकको उपचारका क्रममा मृत्यु भएको थियो । विमानमा सवार कुल ८१ मध्ये पाँचजनामात्र बाँच्न सफल भए । ‘दुर्घटनापछि सिंगो सहर स्तव्धः भएका छ', श्रद्धाञ्जलि दिन सान्टो एन्टोनियो चर्च पुगेकी कार्ला भिलेमब्रिनीले भनिन् ।

दक्षिण अमेरिकाको दोस्रो ठूलो महादेशीय क्लब फुटबल प्रतियोगिता कोपा सुडामेरिकानाको फाइनलको पहिलो लेग खेल्न चापेकोन्सको टोली कोलम्बिया जाँदै थियो ।

चापेकोन्स र कोलम्बियाको एट्लेटिको नासियनलबीच खेल हुने कार्यक्रम थियो । चापेकोन्स ४३ वर्षअघि मात्र स्थापना भएको क्लब हो । अर्जेन्टिनासँग सिमाना जोडिएको चापेकोको कुल जनसंख्या दुई लाख रहेको जनाइएको छ ।

रंगशालाबाहिर पनि श्रद्धाञ्जलि अर्पण गर्न ओइरिएका मानिसहरू खचाखच थिए । ‘आज सहर शान्त छ । सायद मानिसले तबमात्र विश्वास गर्नेछन्, जब उनीहरूले शव देख्नेछन्', स्थानीय एक व्यापारी सेसिलियो हान्सले भने ।

क्लब फुटबलमा पछिल्लो समय चापेकोन्सले हासिल गरेको लगातारको सफलताले चापेको सहर निकै खुसी थियो । ‘म मेरो जीवनको सबैभन्दा खुसीको क्षण पर्खिरहेको थिएँ तर, यो घटनापछि मलाई थाहा छैन, मेरो जीवन कस्तो हुनेछ', स्थानीय फुटबलप्रेमी एलान हाइन्जले भने । सन् २००९ मा ब्राजिलको चौथो डिभिजनमा रहेको चापेकोन्स त्यतिबेलासम्म चापे नामले मात्र चिनिएको थियो । तर लगातारको उत्कृष्ट प्रदर्शनपछि क्लब सन् २०१४ मा पहिलो डिभिजनमा उक्लन सफल भएको थियो ।

दक्षिण अमेरिकामा युरोपको युरोपा लिग सरह मानिने सुडामेरिकानाको फाइनल पुग्ने क्रममा चापेकोन्सले अर्जेन्टिनाका दुई बलिया क्लब लान लोरेन्जो र इनडिपेनडेन्ट तथा कोलम्बियाको क्लब जुनियरलाई हराएको थियो । चापेकोन्समा ब्राजिलको राष्ट्रिय टोलीका सदस्य नरहे पनि ब्राजिल र दक्षिण अमेरिकाको क्लबबाट खेलेका खेलाडीहरू थिए ।

मृत्यु हुनेमध्ये क्लेबर सान्टानाले सन् २००७ देखि तीन वर्ष स्पेनिस क्लब एट्लेटिको म्याड्रिडका लागि खेलेका थिए । यसैगरी स्ट्राइकरद्वय ब्रुनो रान्जेल र केम्पेस यो सिजन ब्राजिलियन लिगमा सर्वाधिक गोलकर्ताको होडमा थिए । घटनामा ज्यान गुमाएका क्लबका प्रशिक्षक काइयो जुनियर पनि चापेकोन्सको सफलताका निर्णायक कडी थिए । यसअघि उनले पालमेइरस, फ्लामेंगो र बोटाबोगो क्लबमा पनि प्रशिक्षण गरेका थिए ।

दुर्घटनामा २० जना खेल पत्रकारको पनि मृत्यु भएको थियो । ज्यान गुमाउने फक्स स्पोर्टसका कमेन्टेटर मारियो सर्जियो पोन्टेस डे पाइभा ब्राजिली राष्ट्रिय टोलीका पूर्वसदस्य पनि हुन् । उनले लामो समय ब्राजिलियन क्लबमा प्रशिक्षण पनि गरेका थिए । ‘फुटबलका लागि यो निकै दुःखको घडी हो', विश्व फुटबल महासंघ (फिफा) अध्यक्ष जियानी इनफान्टिनोले विज्ञप्तिमार्फत भनेका छन् । यसैगरी अर्जेन्टिनाका महान् फुटबल खेलाडी पेलेले पनि दुर्घटनालाई दुःखान्त क्षतिका रूपमा उल्लेख गरेका छन् । ब्राजिलको लिग विजेता पालमेइरसले घरेलु लिगको आफ्नो अन्तिम खेल चापेकोन्सको जर्सी लगाएर खेल्न राष्ट्रिय फुटबल संघसँग अनुमति मागेको छ ।

‘उपाधि चापेकोन्सलाई'

एट्लेटिको नासियनलले सुपर कोपासुडामेरिकानाको उपाधि चेपाकोन्सलाई दिन सम्बन्धित निकायसमक्ष प्रस्ताव गरेको छ । मृतक खेलाडीको सम्झनामा उक्त अवार्ड चापेकोन्सलाई दिइनुपर्ने माग कोलम्बियन क्लब नासियनलले गरेको छ । तर यस विषयमा दक्षिण अमेरिकी फुटबल महासंघले भने हालसम्म कुनै प्रतिक्रिया जनाएको छैन ।

यसैगरी ब्राजिलका केही शीर्ष क्लबले सन् २०१७ को सिजनका लागि आफूहरू केही खेलाडी निःशुल्क रूपमा चेपाकोन्सलाई उपलब्ध गराउन तयार रहेको बताएका छन् । उनीहरूले यो महाविपत्तिबाट नउठेसम्म चापेकोएन्सलाई दोस्रो डिभिजनमा पनि रेलिगेसन गर्न नहुने बताएका छन् ।

‘हाम्रो सपना सकिएको छैन । समयसँगै हामी फेरि फर्कने छौं', चापेकोन्सका कार्यवाहक अध्यक्ष जेल्सन डेल्ला कोस्टाले भने, ‘यो बेला हाम्रो कर्तव्य दुःखमा परेका सबै परिवारको हेरविचार गर्नु हो ।'