जो बाबु बन्ने खबर सुनेर नाचेका थिए

मेदेजिनः ब्राजिलियन फुटबल क्लब चापेकोन्सका स्ट्राइकर टियाग्विन्हो एक साताअघि खुसीले गद्गद् भएका थिए । उनी खुसीले नाच्नुको कारण भने उनकी श्रीमती ग्राजिल थिइन् । ग्राजिलले एक साताअघि श्रीमानलार्इ उनी बाबु बन्न लागेको खबर सुनाएपछि टियागुन्हिओ खुसीले उफ्रिएका थिए ।

उनकी श्रीमतीले उनी बाबु बन्न लागेको खबरसहित एउटा सानो बक्समा बच्चाले लगाउने एक जोडी जुत्ता पनि पठाएकी थिइन् । त्यो सुखद समाचार पाएपछि टोली बसेको होटेलमै उनले सहकर्मी खेलाडी साथीसँग खुसी साटासाट गरेका थिए । २२ वर्षीय टियाग्विन्हो पहिलो पटक बाबु बन्न लागेको खुसीमा टोलीका साथी पनि उनीसँग होटेलमा मजैले नाचेका थिए ।

टियाग्विन्हो र उनका साथीहरूले मनाएको खुसीको भिडियो दृश्य अहिले सामाजिक सञ्जालहरूमा समेत भाइरल भएको छ । त्यतिबेलै टियाग्विन्हो बाबु बन्न लागेको खुसीलाई उनका साथीहरूले सामाजिक सञ्जालमा फैलाएका थिए ।

तर त्यसको एक साता पनि बित्न नपाउँदै मंगलबार बिहान कोलम्बियाको मेदेजिनमा भएको विमान दुर्घटनामा परी टियाग्विन्होको दुःखद् निधन भयो । विमान दुर्घटनाको हृदयविदारक समाचारले अहिले टियाग्विन्होको परिवारमात्र होइन, ब्राजिल र विश्व फुटबललाई नै शोकाकुल बनाएको छ ।

ब्राजिलको ‘ए’ डिभिजन फुटबल क्लब चापेकोन्सका खेलाडी सवार उक्त विमानमा परेका खेलाडीमध्ये मिडफिल्डर एलन रस्चेल, रक्षक हेलियो नेटो जाम्पियर र गोलरक्षक ज्याक्सन फोलम्यानमात्र जीवित बचे । गोलरक्षक मार्कोस डानिलोलाई समेत जीवितै उद्धार गरिए पनि पछि उपचारका क्रममा अस्पतालमा उनको निधन भएको थियो ।

उक्त दुर्घटनामा परी प्रशिक्षक काइयो जुनियर, फिजियो एन्डर्सन पिएक्सो, मिडफिल्डर क्लेबर सान्टाना, गोलरक्षक डानिलो, स्ट्राइकरहरू ब्रुनो रन्जेल, एभर्टन केम्पस अनानियास, रक्षक फिलिप माचाडो र मिडफिल्डर जोसिमरको मृत्यु भयो ।

खेलाडी, प्रशिक्षक, पदाधिकारी र सञ्चारकर्मीसहित ८१ जना बोकेर बोलिभियाको सान्ता क्रुजबाट उडेको उक्त जहाज कोलम्बियाको मेदेजिननजिक दुर्घटना हुँदा ७६ जनाले ज्यान गुमाए । दुर्घटनामा परी उद्धार गरिएको पाँचजनाको भने हाल उपचार भइरहेको छ । उक्त खेलको समाचार संकलन गर्न २१ जना खेलपत्रकार पनि सोही विमानमा गएका थिए ।

जो भाग्यले बाँचे

फुटबल खेल्नका लागि विभिन्न कारण ब्राजिल जान नपाएका केही खेलाडी, पदाधिकारी र अफिसयल भने भाग्यले बाँच्न सफल भएका छन् । टोलीका खेलाडीमध्ये स्ट्राइकर अलेजेन्ड्रो मार्टिनुसियो र हायोरन तयारीका अभ्यासका क्रममा घाइते भएकाले उनीहरू टोलीसँग कोलम्बिया जान पाएनन् । सोही कारणले उनीहरू दुर्घटनामा पर्नबाट जोगिए ।

यसैगरी प्रशिक्षक काइयोका २५ वर्षीय छोरा म्याथ्यु सारोली पनि सोही विमानमा कोलम्बिया जाने कार्यक्रम थियो । उनी कोलम्बिया जान विमानस्थल पनि पुगिसकेका थिए । तर विमान चढ्न जानुअघि उनले आफ्नो राहदानी घरमै छुटेको थाहा पाए । त्यसपछि उनी अर्को विमानमा कोलम्बिया जाने गरी पुनः घर फर्किएका थिए । सोही कारणले उनी पनि दुर्घटनामा पर्नबाट जोगिएका थिए ।

यसैगरी फाइनल खेल हेर्न जाने तर्खरमा रहेका चापेकोका मेयर लुसियानो बुलिगोन पनि भाग्यवश उक्त विमानमा चढ्नबाट जोगिएका थिए । अन्तिम समयमा आएर आकस्मिक बैठक परेकाले उनले उक्त विमानमार्फत कोलम्बिया जाने कार्यक्रम रद्द गर्नु परेको थियो । अघिल्लो दिन अबेरसम्म पनि मेयर बुलिगोन फाइनल खेल हेर्न सोही विमानबाट कोलम्बिया जाने कार्यक्रम थियो ।