एल क्लासिको बराबरीमा सकियो, रियल मड्रिडको ६ अंकको अग्रता कायमै
काठमाडौंः बार्सिलोनालाई बराबरीमा रोक्दै लिग लिडर रियल मड्रिडले ६ अंकको अग्रता कायमै राखेको छ।
बार्सिलोनाको घरेलु मैदान क्याम्प नाउमा भएको खेलमा पाहुना टोली रियल मड्रिडले बार्सिलोनालाई १–१ गोलको बराबरीमा रोकेको हो।
खेलमा अग्रता भने बार्सिलोनाले खेलको ५३ औं मिनेटमा लुइस स्वारेजको गोलबाट लिएको थियो। स्वारेजले नेमारले प्रहार गरेको ‘स्पट किक’ मा हेडमार्फत गोल गरेका थिए।
तर, बार्सिलोनाले १–० को अग्रता कायम गर्न सकेन। खेलको ९० औं मिनेटमा रियल मड्रिडका लागि कप्तान सर्जियो रामोसले हेड गोल गर्दै १–१ को बराबरीमा ल्याए।
बराबरीसँगै लिगको शीर्ष स्थानमा रहेको रियल मड्रिडको १४ खेलबाट ३४ अंक भएको छ भने दोस्रो स्थानमा रहेको बार्सिलोनाको समान खेलबाट २८ अंक छ। तेस्रो स्थानमा रहेको सेभिल्लाको समान खेलबाट २७ अंक छ।
प्रतिक्रिया दिनुहोस !
