टोलीमा नयाँ खेलाडीको बाहुल्य

काठमाडौंः अर्को साताबाट श्रीलंकामा सुरु हुने एसियाली क्रिकेट काउन्सिल (एसिसी) यू-१९ एसिया कप क्रिकेटका लागि घोषित नेपाली राष्ट्रिय टोलीमा अधिकांश नयाँ अनुहारलाई समावेश गरिएको छ । छनोट समितिले आगामी मंसिर २८ देखि पुस ९ गतेसम्म आयोजना हुने उक्त प्रतियोगिताका लागि सोमबार सार्वजनिक गरेको १५ सदस्यीय टोलीमा आधाभन्दा बढी नयाँ खेलाडी छन् ।

टोलीमा समावेश गरिएका १५ खेलाडीमध्ये ६ जनासँगमात्र यसअघि यू-१६ वा यू-१९ राष्ट्रिय टोलीबाट खेलेको अनुभव छ । त्यसबाहेकका सबै नौ खेलाडी नयाँ हुन् । पुरानामध्ये आदिल खान, दीपेन्द्रसिंह ऐरी र सन्दिप सुनारले गत वर्ष मलेसियामा भएको एसीसी यू-१९ प्रिमियर लिग खेलेका थिए । यसैगरी आफिस शेख, रवीन्द्रजंग शाही र पवन सर्राफ सन् २०१४ मा मलेसियामै भएको एसीसी यू-१६ प्रिमियर लिग खेलेका खेलाडी हुन् ।

चार वर्षअघि मलेसियामा सम्पन्न यू- १६ प्रिमियर क्रिकेटको उपाधि जित्दा कप्तान रहेका सुमित महर्जन भने अहिले टोलीमा परेका छैनन् । सुमितलाई छनोट समितिले ५२ जनाको प्रारम्भिक क्याम्पमा समेत समावेश गरेको थिएन ।

यद्यपि अन्तिम समयमा बोलाइएका सुमित १५ सदस्यीय टोलीमा अटाउन सकेनन् । सुमितसँगै सोही प्रतियोगितामा उत्कृष्ट बलर घोषित भएका जितेन्द्रसिंह र ‘प्रोमिसिङ' खेलाडी घोषित अनिल खरेल पनि टोलीमा परेनन् । अनिल ५२ जनाको प्रारम्भिक सूचीमै परेका थिएनन् ।

नेपाल क्रिकेट संघ (क्यान) को नौवटा क्षेत्रभित्र विभिन्न ६ केन्द्र बनाई सञ्चालन गरिएको ट्यालेन्ट हन्टमार्फत ५२ जना खेलाडी छनोट गरिएको थियो । उनीहरूलाई १० दिनसम्म आन्तरिक प्रतिस्पर्धा गराई १५ सदस्यीय अन्तिम टोली घोषणा गरिएको हो ।

अन्तर्राष्ट्रिय क्रिकेट काउन्सिल (आईसीसी) को एसिया क्षेत्र हेर्ने विकास निर्देशक बेन्कटपथि राजुको नेतृत्वमा रहेको प्रशिक्षकद्वय जगत टमाटा र विनोद दाससहितका तीन सदस्यीय छनोट समितिले टोलीको कप्तानीको जिम्मेवारी सिनियर राष्ट्रिय टोलीबाट समेत खेलिसकेका सन्दिप लामिछानेलाई दिएको छ ।

टोलीका अन्य सदस्यमा भीम सार्की, अनिलकुमार शाह, सुवर्णकर उराह, कमलसिंह ऐरी, नन्दन यादव, प्रकाश केसी, अभिनाश कर्ण र रोहितकुमार पौडेल छन् । यसैगरी समितिले चार वैकल्पिक खेलाडीको नामसमेत सार्वजनिक गरेको छ । वैकल्पिक खेलाडीमा साहव आलम, किशोर महतो, विक्रम भुसाल र सुशान्त थापा रहेका छन् ।

प्रतियोगितामा नेपाल टेस्ट मान्यता प्राप्त भारत र श्रीलंकाको युवा टोलीसमेत रहेको समूह ‘ए' मा परेको छ । उक्त समूहमा मलेसिया पनि छ । नेपालले मंसिर ३० गते श्रीलंकासँग खेलेर प्रतियोगितामा आफ्नो यात्रा सुरु गर्नेछ । यसैगरी पुस १ गते भारत र पुस ३ गते मलेसियासँग खेल्नेछ ।