पुस्तक सिफारिस

१. ग्याब्रेल गार्सिया मार्खेजको उपन्यास ‘वान हन्ड्रेड इयर्स अफ सोलिट्युड’
‘म्याजिक रियालिजम’को प्रयोग, विषयवस्तुलाई फरक दृष्टिकोणबाट प्रस्तुत गर्ने सार्थक प्रयास, लेखकको आफ्नो जीवन अनुभव र काल्पनिकी संसारको सुन्दर बुनोटले गर्दा यो आख्यान पढ्न रुचाउँछु ।

२. भर्जिनिया उल्फको उपन्यास ‘ओल्र्यान्डो’
लैंगिकता र यौनिकताको परम्परागत सोच र व्यापक मान्यतालाई विस्थापित गर्दै बाध्यात्मक इतरलिंगी सम्बन्धको उपहास गर्छ । जेन्डर र सेक्ससम्बन्धी संकुचित सोचको सीमित ज्ञानघेरालाई उल्फले आख्यानमार्फत चुनौती दिएकी छन् ।

३. शारदा शर्माको उपन्यास ‘कम्प’
गरुण पुराणमा संकलित धार्मिक अन्धविश्वास र ढोंगलाई स्वर्गलोक र यमलोकको स्वैरकाल्पनिक विम्बलाई व्यंग्यात्मक रूपले प्रयोग गरिएको छ । यस उपन्यासलाई धार्मिक रूढिवादी सामूहिक अवचेतनलाई उच्छेदक गर्ने प्रयासका रूपमा पनि पढ्न सकिन्छ । उपन्यासमा जातीय र लैगिंक पहिचानका कुरा र समकालीन समाजको चित्रणसँगै लोक र परलोकको प्रस्तुतिले पाठकलाई सहमति र असहमतिको दोसाँधमा उभ्याउँछ ।

४. कमला दासको आत्मकथन ‘माइ स्टोरी’
आफ्नो वैवाहिक सम्बन्ध, परपुरुषसँगको सम्बन्ध, दुःखसुखका क्षणहरू र जीवनका अन्य आयामबारे इमानदारीपूर्वक कमला दासले खुलेर लेखेकी छन् । महिलाका लागि इमानदार भएर आत्मलेखन गर्नु ठूलो चुनौती हो र कमला दास जस्तो इमानदार र साहसिला लेखक धेरै कम छन् । यस कृतिको इमानदारिता र आत्मलेखनका लागि चाहिने अदम्य साहसले मेरो मनमा अमिट छाप छाडेको छ ।

५. सरिता तिवारीको कविता संग्रह ‘प्रश्नहरूको कारखाना’
यस संग्रहमा संकलित धेरैजसो कविता विषय र विचारका संवाहक छन् । जोदाहा चेतबाट अभिप्रेरित कविताहरू सीमान्तकृत नागरिक स्वतन्त्रता, हकहितका पक्षमा र समाजमा स्थापित विभेदीय संरचना र व्यवहारविरुद्ध संघर्षरत छन् । कवितामा निहित आक्रोश र संघर्षचेतले पाठकमनलाई नराम्ररी चिमोट्छ र घच्घचाइ रहन्छ ।