साताैं राष्ट्रिय खेलकुद आजदेखि सुरु

विराटनगरः विभिन्न कारणले पटकपटक स्थगित हुँदै निर्धारित समयभन्दा करिब पाँच वर्ष पछि सरेको बृहत् राष्ट्रिय खेलकुद प्रतियोगिताको सातौं संस्करण शुक्रबारदेखि औपचारिक रूपमा सुरु हुने भएको छ । औद्योगिक नगरी विराटनगरस्थित सहिद रंगशालामा शुक्रबार अपरान्ह राष्ट्रपति विद्यादेवी भण्डारीबाट उद्घाटन भएपछि सातौं राष्ट्रिय खेलकुद औपचारिक रूपमा प्रारम्भ हुनेछ ।

विगतदेखि नै भौतिक पूर्वाधार, नियमित खेल गतिविधिजस्ता विषयमा अब्बल रहे पनि पूर्वाञ्चल विकास क्षेत्रमा राष्ट्रिय खेलकुद प्रतियोगिता आयोजना हुन लागेको यो पहिलो पटक हो । प्रत्येक दुईदुई वर्षमा आयोजना हुने भनिए पनि छैटौं र सातौं संस्करणको बीचमा पाँच वर्षको अन्तराल रह्यो । सूदूरपश्चिमाञ्चलको कैलाली र कञ्चनपुरमा २०६८ साल फागुन १४ देखि २१ गतेसम्म सम्पन्न छैटौं राष्ट्रिय खेलकुदको समापन समारोहमा सातौं संस्करण पूर्वाञ्चलमा आयोजना गर्ने गरी झन्डा हस्तान्तरण गरिएको थियो ।

सातौं खेलकुदको उद्घाटन समारोहमा प्रधानमन्त्री पुष्पकमल दाहाल, मन्त्रीहरू, सरकारी निकायका उच्च अधिकारीसँगै विभिन्न क्षेत्रका लब्धप्रतिष्ठित व्यक्तित्वको समेत उपस्थिति रहनेछ । करिब दुई हजार दर्शक क्षमताको सहिद रंगशालामा अपरान्ह ३ बजे सुरु हुने उद्घाटन समारोह दुई घन्टा ३० मिनेट चल्ने जानकारी समारोह उपसमितिका सचिव कुलबहादुर थापाले दिए ।

थापाले सातौं खेलकुदको उदघाटन समारोहलाई सन् २०१९ मा नेपालमै आयोजना हुने १३ औं दक्षिण एसियाली खेलकुद (साग) को पूर्वतयारीका रूपमा लिइएको बताए । उद्घाटन समारोहमा प्रतियोगितामा सहभागी टोलीका खेलाडी र पदाधिकारीले मार्चपास्ट गर्नेछन् भने करिब तीन हजार पाँच सय कलाकार तथा विद्यालयका विद्यार्थीले राष्ट्रको कला र संस्कृति झल्कने विभिन्न प्रस्तुति दिनेछन् ।

प्रतियोगितामा पाँचवटा विकास क्षेत्रका टोलीसँगै तीनवटा विभागीय टोली त्रिभुवन आर्मी क्लब, सशस्त्र प्रहरी बलको एपीएफ क्लब र नेपाल पुलिस क्लबका खेलाडीको सहभागिता रहनेछ । प्रतियोगितामा खेलाडी, प्रशिक्षक, निर्णायक, पदाधिकारी गरी कुल पाँच हजार आठ सय ४९ जनाको सहभागिता रहनेछ । प्रतियोगितामा जिल्ला र क्षेत्रीय छनोट पार गरी आएका कुल तीन हजार नौ सय ७२ जना खेलाडीले प्रतिस्पर्धा गर्नेछन् ।

सातौं खेलकुदमा विभिन्न ३० वटा खेल समावेश गरिएको छ । तर स्क्वास, साइक्लिङ, आर्चरी र फेन्सिङको पदकलाई भने पदकतालिकामा जोडिने छैन । सातौं राष्ट्रिय खेलकुदअन्तर्गतका पौडी, ट्रायथलन र शारीरिक सुगठनका प्रतियोगिता भने करिब एक वर्षअघि नै सम्पन्न भइसकेका छन् ।

यसदेखि बाहेक गल्फ र विलियर्ड तथा स्नुकर प्रतियोगितामा भने सम्बन्धित संघले आफ्नै खर्चमा आयोजना गर्ने भएका छन् । यसैगरी प्रतियोगितामा रग्बी, डान्स स्पोटर््स, साम्बो, रक क्लाइम्बिङ र दोहोरीलाई प्रदर्शनी खेलका रूपमा समावेश गरिएको छ ।

प्रतियोगिताका खेलहरू पूर्वाञ्चलका सुनसरी, मोरङ, झापा, सप्तरी, सिराहा, धनकुटा र उदयपुरमा आयोजना हुनेछन् । यसैगरी भौतिक पूर्वाधारको अभावका कारण स्क्वास ललितपुरमा, लनटेनिस कास्कीमा र फेन्सिङ काठमाडौंमा आयोजना हुनेछन् ।

प्रतियोगितामा दुई सय ९४ स्वर्ण, दुई सय ९४ रजत र चार सय ४७ कांस्य पदकका लागि खेलाडीबीच प्रतिस्पर्धा हुनेछ । तर पदक तालिकामा भने दुई सय ६८ स्वर्ण, दुई सय ६८ रजत र चार सय १६ वटा कांस्य पदकमात्र गणना गरिनेछ । यो पदकमा यसअघि नै सम्पन्न भइसकेका पौडी, ट्रायथलन र शारीरिक सुगठनको पदक भने जोडिएको छैन ।

प्रतियोगितामा स्वर्ण पदक जित्ने व्यक्तिगत स्पर्धाका खेलाडीले १५ हजार रुपैयाँ र टिम स्पर्धाका खेलाडी सात हजार रुपैयाँ नगद पुरस्कार पनि पाउनेछन् । यसैगरी राष्ट्रिय कीर्तिमान बनाउने खेलाडीलाई थप २५ हजार रुपैयाँ पुरस्कार प्रदान गरिनेछ । ‘खेलाडीलाई पदक जितेबापत प्रदान गरिने नगद पुरस्कार पदक वितरण समारोहमै तत्काल प्रदान गरिनेछ ।

यस पटक खेलाडीले नगद पुरस्कार लिन राखेप धाइरहने परम्पराको अन्त्य हुनेछ’, राष्ट्रिय खेलकुद परिषद् (राखेप) का सदस्यसचिव केशवकुमार विष्टले भने । प्रतियोगिता आयोजनाका लागि ३१ करोड रुपैयाँ माग गरिएकोमा सरकारले २८ करोड रुपैयाँ उपलब्ध गराइसकेको जानकारी पनि सदस्यसचिव विष्टले दिए ।

सातौं खेलकुदअन्तर्गतको महिला फुटबल सुनसरीको दुहवीमा र पुरुष फुटबल धरानमा सुरु भइसकेको छ । प्रतियोगितामा सहभागी हुन अधिकांश खेलाडी सम्बन्धित खेल स्थलमा पुगिसकेका छन् । खेलाडी र खेल पदाधिकारीहरू आउनेक्रम बिहीबार बिहानसम्म जारी रहने बताइएको छ ।

सातौं खेलकुदमा सहभागी हुन आउनेका कारण पूर्वाञ्चलका विभिन्न सहरमा चहलपहल पनि निकै बढेको छ । प्रतियोगिताको समापन पुस १५ गते धरानस्थित एन्फा टेक्निकल सेन्टरको मैदानमा हुनेछ ।

मोरङ कांग्रेसद्वारा प्रतियोगिता बहिष्कार

नेपाली कांग्रेस मोरङले सातौं राष्ट्रिय खेलकुद प्रतियोगिता बहिष्कार गर्ने निर्णय गरेको छ । प्रतियोगिताअन्तर्गत हुने उद्घाटन समारोहमा पनि कांग्रेसका कुनै पनि पदाधिकारी सहभागी नहुने निर्णय गरिएको जानकारी मोरङ कांग्रेसका सचिव नागेश कोइरालाले दिए ।

उनले भने, ‘विराटनगरमा भइरहेको यति ठूलो खेल उत्सवमा कुनै पनि पक्षबाट कांग्रेसलाई सहभागी गराइएको छैन् । हामीले यो प्रतियोगिता नै बहिष्कार गर्ने निर्णय गरेका छौं ।’ बिहीबार कांग्रेसको पदाधिकारीको छलफलपछि प्रतियोगिता बहिष्कार गर्ने निर्णय गरिएको उनले बताए ।

एक महिनाअघि मैत्रीपूर्ण फुटबल गर्ने भनेर प्रतियोगिता आयोजक समितिले पत्राचार गरे पनि त्यसयता भने कुनै छलफल नगरिएको कोइरालाले बताए । राष्ट्रपति विद्यादेवी भण्डारीले उद्घाटन गर्ने कार्यक्रममा पनि मोरङका सांसद र मन्त्रीले सहभागिता नजनाउने निर्णय गरेको सचिव कोइरालाले बताए ।