मिडिया कप फुटबल: इमेजको विजयी सुरुवात

काठमाडौं: इमेज च्यानलले आठौं मिडिया कप फुटबल प्रतियोगितामा विजयी सुरुआत गरेको छ । त्रिपुरेश्वरस्थित दशरथ रंगशालामा आइतबार भएको उद्घाटन खेलमा इमेज च्यानलले अन्नपूर्ण पोस्ट् राष्ट्रिय दैनिकलाई ३–० गोलले हरायो । समूह ‘बी’ अन्तर्गतको लिग खेलमा इमेजले तीनवटै गोल दोस्रो हाफमा गरेको थियो । इमेजको जितमा सम्बद्र्धन प्रधानले दुई गोल गरे । एक गोल विजय कार्कीले गरेका थिए ।

प्रतियोगिताको नेपाल क्यान्सर अस्पतालका कार्यकारी अध्यक्ष सुदीप श्रेष्ठले एक कार्यक्रमबीच उद्घाटन गरे । नेपाल ओलम्पिक संग्रहालयद्वारा आयोजित प्रतियोगितामा सात टोलीले भाग लिएका छन् । सहभागी टोलीलाई दुई समूहमा विभाजन गरी लिग कम नकआउट आधारमा खेलाइएको छ । प्रतियोगिताको समूह ‘ए’ मा एपी वान टेलिभिजन, नेपाल टेलिभिजन, कान्तिपुर मिडिया ग्रुप र एभी न्युज टेलिभिजन रहेका छन् ।

यसैगरी समूह ‘बी’ मा अन्नपूर्ण पोस्ट्, इमेज च्यानल र रेडियो नेपाल छन् । प्रतियोगिताको विजेता टोलीले ५० हजार र उपविजेताले २५ हजार रुपैयाँ पुरस्कार प्राप्त गर्नेछन् । प्रतियोगिताको उत्कृष्ट खेलाडी, उत्कृष्ट गोलरक्षक, सर्वाधिक गोलकर्ता र अनुशासित टोलीलाई पनि पाँचपाँच हजार रुपैयाँबाट पुरस्कृत गरिने आयोजक संग्रहालयका संस्थापक अध्यक्ष क्षितिजअरुण श्रेष्ठले जानकारी दिए । सोमबारको पहिलो खेल नेपाल टेलिभिजन र साबिक विजेता कान्तिपुर मिडिया ग्रुपबीच हुनेछ । दोस्रो खेल एपी वान टेलिभिजन र एभी न्युज टेलिभिजनबीच हुनेछ ।