आहा रारा गोल्ड कप फुटबलमा अमेरिकाको क्लब पनि सहभागी
पोखराः आहा रारा गोल्ड कप फुटबल प्रतियोगिता माघ ४ देखि सुरु हुने भएको छ। सहारा क्लब पोखराको आयोजनामा पोखरा रङ्गशालामा हुने १५ औँ आहा रारा गोल्ड कप फुटबल प्रतियोगितामा अमेरिकाको एक क्लबसहित १२ टोलीको सहभागिता रहनेछ।
सहारा क्लबले आइतबार पत्रकार सम्मेलन गरी अमेरिकाको अना युएसए फुटबल टिमसहित बंगलादेशको फरासगन्ज एससी र भारतको युनाइटेड सिक्किम फुटबल क्लब पनि सहभागी हुने जानकारी दिएको छ।
यसैगरी तीन विभागीय टोली आर्मी, नेपाल पुलिस र सशस्त्र प्रहरीको एपीएफ क्लब, आयोजक सहारा क्लब, सुदूरपश्चिम ११ स्पोर्टिङ क्लब, धरान फुटबल क्लब, रमपम झापा ११ र सङ्कटा क्लब सहभागी हुने आयोजक एवं क्लबका महासचिव केशवराज बरालले जानकारी दिए।
उनका अनुसार प्रतियोगिताको विजेता टोलीले पाँच लाख एक हजार एक रुपैयाँ र उपविजेताले दुई लाख ५१ हजार एक रुपैयाँसहित सिल्ड, पदक र प्रमाणपत्र पाउनेछन्। प्रतियोगिताको मुख्य प्रायोजक हिमश्री फुड्स प्रालि रहेको छ।
प्रतिक्रिया दिनुहोस !
