सपथ समारोहमा कस्तो पहिरनमा पुग्दैछिन् ट्रम्प पत्नी मेलानिया...

नवनिर्वाचित अमेरिकी राष्ट्रपति डोनाल्ड ट्रम्पका लागि जनवरी २० विशेष दिन हुनेछ । शुक्रबार (आज) राष्ट्रपतिका रूपमा उनी पहिलोपटक ह्वाइट हाउस प्रवेश गर्दैछन् । ७० वर्षीय ट्रम्पसँगै प्रथम महिला मेलानिया यस दिन कुन रूपमा प्रस्तुत हुनेछिन्, चासोको विषय बनेको छ ।

सुरुदेखि नै स्टाइलिस्ट महिलाको छवि बनाएकी ४६ वर्षीया मेलानिया यसैको तयारीमा जुटेकी छन् । 'यूएस विक्ली'का अनुसार ह्वाइट हाउस प्रवेशमा कसरी प्रस्तुत हुने र कस्तो पहिरन लगाउने भन्ने विषयमा उनको पूरै टिम लागेको छ ।

मेलानिया फेसनमा आफैं निकै अगाडि भएका कारण कसरी राम्री र बोल्ड देखिने भन्ने थाहा भएकाले डिजाइनरलाई थप सजिलो हुने उनका एक डिजाइनर निकोलले बताएकी छन् । ह्वाइट हाउस गएपछि मेलानिया आफ्नो लागि आफैंले 'ग्लामरुम' डिजाइन गर्ने र ह्वाइट हाउसलाई नयाँ रूप दिने बताएकी छन् । यूएस विक्लीका अनुसार मेलानिया लाइटिङ मिलेको उत्कृष्ट डिजाइन मन पराउँछिन् ।

कसरी आकर्षक देखिने, कस्ता पहिरनमा कस्ता मेकअप प्रयोग गर्ने भन्ने विषयमा दैनिक एक घन्टा पन्ध्र मिनेट अभ्यास गर्ने गरेको डिजाइनरहरूले बताएका छन् ।

मेलानियाका लागि डिजाइन कसले गर्ने भन्ने विषय पनि चासोको विषय बनेको छ । उनका लागि ८३ वर्षीया कार्ल लगेरफेल्ड र ७७ वर्षीया राल्फ लरेनले डिजाइन गर्ने भएका छन् । उनीहरूलाई मेलानियाले छनोट गरेकी हुन् । उनीहरूको डिजाइनले आफ्नो मन चोरेको उनले बताएकी छन् ।

यसलाई राल्फले पनि जीवनकै ठूलो अवसरका रूपमा लिएका छन् । यो अवसरले आफ्नो व्यापारले निकै उचाइ लिने आशा उनको छ । राल्फले मेलानियालाई मोडलभन्दा अब्बल सुन्दर महिलाका रूपमा प्रस्तुत गरेको बताएका छन् । कार्ल जर्मनीका डिजाइनर हुन् ।

अचम्म के भने टम फोर्ड, मार्क याकोबसलगायत धेरै डिजाइनरले मेलानियाका लागि डिजाइन गर्न अस्वीकार गरेका थिए । तर, मेलानियाको पक्षमा टम्मी हिलफिगर, डियान भोन फोर्सटेनबर्गजस्ता चर्चित डिजाइनर उभिए । अमेरिकी डिजाइनरहरूले हिलारीभन्दा राम्रो फेसन गर्ने महिलाका रूपमा मेलानियालाई लिएका छन् । उनका लागि डिजाइन गर्न अस्वीकार गर्नेले पनि मेलानियालाई राम्रो फेसन सेन्स भएकी महिलाका रूपमा भने स्वीकारेका छन् ।

बाराक ओबामाको ठाउँमा आउँदै गरेका डोनाल्ड ट्रम्पले ४५औं राष्ट्रपतिका रूपमा शपथ लिँदैछन् । नोभेम्बर ८ मा भएको चुनावको ठीक १०औं सातापछि उनले शपथ लिन लागेका हुन् । ट्रम्पसँगै मेलानियाको ड्रेस र डिजाइनरको पनि त्यतिकै चर्चा भएको छ । एजेन्सी