नेपालको पाँचौं हार

पुनेः दोस्रो दृष्टिविहीन टीट्वेन्टी विश्वकप क्रिकेट प्रतियोगितामा नेपालले पाँचौं हार बेहोरेको छ । विश्वकपअन्तर्गत आइतबार भएको आफ्नो छैटौं खेलमा नेपाल श्रीलंकासँग एक सय ३१ रनले पराजित भयो ।

नेपाल यसअघि अस्ट्रेलिया, बंगलादेश, पाकिस्तान र वेस्टइन्डिजसँग पराजित भएको थियो । नेपालले जारी प्रतियोगितामा एकमात्र जित दक्षिण अफ्रिकासँग निकालेको थियो ।

पुनेस्थित एमवाईसी क्रिकेट मैदानमा टस जितेर पहिले ब्याटिङ गरेको श्रीलंकाले निर्धारित २० ओभरमा दुई विकेट गुमाउँदै दुई सय ७४ रनको योगफल जोडेको थियो । प्रत्युत्तरमा नेपालले २० ओभर पूरै खेल्दै पाँच विकेटको क्षतिमा एक सय ४३ रनमात्रै जोड्न सक्यो ।

नेपालका लागि सुरुवाती ब्याट्सम्यान सुनील थापामगरले ३० बलमा ३८ रनको योगदान दिए । उनले आफ्नो पालीमा चार चौका प्रहार गरेका थिए । यस्तै कप्तान कीर्तन श्रेष्ठ दुवालले ४७ बलमा ३७ रन तथा पदमबहादुर बडैलाले १८ बलमा २३ रनको योगदान दिए । कीर्तनले दुई तथा पदमले तीन चौका प्रहार गरेका थिए ।

त्यसबाहेक अब्दुलजाहिर फकिर १०, लोकबहादुर थापा आठ रन तथा सुनील रानामगर एक रनमा रनमा आउट भए । सुरुवाती ब्याट्सम्यान विक्रमबहादुर राना पहिलो बलमै पेभेलियन फर्किएका थिए ।

श्रीलंकाका लागि सुरुवाती ब्याट्सम्यान सुरङ्गा सम्पथले ४८ बलमै एक सय ११ रनको शतकीय पारी खेले । एक छक्का तथा १९ चौका प्रहार गरेका उनी रिटायर्ड हर्ट भएका थिए । सम्पथबाहेक अर्का सुरुवाती ब्याट्सम्यान रुवान वासन्थाले ४१ बलमा ७६ रन जोडे । उनले पनि आठ चौका प्रहार गरेका थिए ।

कभिदु थोमाले १२ बलमा अविजित ३२ रन जोड्दा रुवान थिलकाले १८ बलमा ३३ रन बनाए । नेपालले श्रीलंकालाई २१ अतिरिक्त रन उपहार दिएको थियो भने २६ रन उपहार पाएको थियो ।

नेपाली टोलीका प्रशिक्षक रिजन प्रजुले नेपाली खेलाडीले श्रीलंकाविरुद्ध पनि फिल्डिङमा कमजोर प्रदर्शन गर्दा भारी रनले हार बेहोर्नुपरेको बताए । ‘ श्रीलंका हामीभन्दा निक्कै उत्कृष्ट टोली हो । उनीहरूलाई पराजित गर्न मुस्किल थियो', प्रशिक्षक प्रजुले भने, ‘तर, खेलाडीले फिल्डिङमा निक्कै कमजोर प्रदर्शन गरे । हातमा आएको बललाई रोक्न नसक्दा हामीले श्रीलंकालाई ५०-६० रन बढी दियौं । त्यसैले श्रीलंकाविरुद्ध ठूलोअन्तरको हार बेहोर्नु पर्‍यो ।'

नेपालले श्रीलंकाका दुवै खेलाडीलाई रन आउट गरेको थियो । नेपालका सुनील थापामगर र रमेशबहादुर बानियाँले श्रीलंकाका खेलाडीलाई आउट गरेका थिए ।

।