पाल्पा : पाल्पामा भएका सवारी दुर्घटनामा पाँचजनाको ज्यान गएको छ भने १७ जना घाइते भएका छन् ।
दोभान गाविस ४ श्रीडाँडामा जिप दुर्घटनामा परी एउटै गाउँका ४ जनाको ज्यान गएको छ भने १६ जना घाइते भएका छन् । श्रीडाँडाबाट जन्तीको पञ्जेबाजा बजाउने टोली बोकेर झुम्सा झरेको लु १ ज २६८९ नम्बरको जिप सोमबार राति दुर्घटना भएको जिल्ला प्रहरी कार्यालय पाल्पाले जनाएको छ ।
दुर्घटना परी दोभान २ देउरालीका ४९ वर्षीय हरिप्रसाद राना, ३० वर्षीय मीनप्रसाद थापा, ४१ वर्षीय जसवीर वाकावल र २६ वर्षीय यमबहादुर रानाको ज्यान गएको प्रहरीले जनाएको छ । उनीहरू विवाह घरमा बाजा बजाएर घर फर्किएका थिए । विवाहमा पञ्जेबाजासहित रमाइलो गराएर घर फर्केकाहरू घर नपुगेपछि देउराली गाउँमा रुवावासी भएको छ ।
कच्ची ओरालो सडक र जिपको ब्रेक फेल भएर सडकबाट २ सय मिटर तल खसेर दुर्घटना भएको हो । राति र भिरालो क्षेत्र भएकाले उद्धारमा समेत समस्या परेको थियो । घाइतेको लुम्बिनी अञ्चल अस्पताल बुटवलमा उपचार भइरहेको छ । जिप चालक २७ वर्षीय विमल दर्लामीसहित अन्य ८ जनाको अवस्था गम्भीर रहेको अस्पतालले जनाएको छ । दुर्घटनास्थल दोभन प्रहरीचौकीभन्दा ९ किलोमिटर टाढा कच्ची सडकमा पर्छ ।
बसको ठक्करबाट अर्का एकजनाको ज्यान गएको छ भने एकजना घाइते भएका छन् । तानसेन तम्घास सडकअन्तर्गत तानसेन १३ ढुंगाखानीमा बसको ठक्करबाट मोटरसाइकल चालक तानसेन १० का १९ वर्षीय संगीत दर्माको ज्यान गएको पाल्पा प्रहरीले जनाएको छ ।
लु १ ख ६९८२ बस र लु २१ प ९२८७ नम्बरको मोटरसाइकल आपसमा ठोक्किएका हुन् । ठक्करबाट घाइते भएका दर्माको मिसन अस्पतालमा उपचारको क्रममा मृत्यु भएको छ भने घाइते मोटरमा सवार चिदिपानी ४ का अमित सारुको मिसन अस्पतालमै उपचार भइरहेको छ ।
प्रतिक्रिया दिनुहोस !
