आइएसद्वारा रेडक्रसका छ कर्मचारीको हत्या
काबुलः कट्टर धार्मिक अतिवादी समूह इस्लामिक स्टेट-आईएस)ले अफगानिस्तानको जौजाङ प्रान्तमा बुधबार अन्तर्राष्ट्रिय रेडक्रसका ६ जना कर्मचारीको हत्या गरेको छ ।
आइएस लडाकुले स्थानीय समयअनुसार बिहान करिब १० बजेतिर कर्मचारीमाथि आक्रमण गरेको अन्तर्राष्ट्रिय रेडक्रसका काबुलस्थित प्रवक्ता रमिन अयाज अहमदले जानकारी दिए । ‘दुर्भाग्यवश जौजाङ प्रान्तमा आज भएको अप्रिय घटनामा हाम्रा ६ जना कर्मचारी मारिएका छन्', उनले सञ्चारमाध्यमसँग भने ।
जौजाङ प्रान्तका गभर्नर लुटफुल्लह अजिजले पनि बिहान भएको घटनाको पुष्टी गरेका छन् । ‘इस्लामिक स्टेट (आईएस) समर्थित लडाकु समूहले अन्तर्राष्ट्रिय रेडक्रसका आठ जना कर्मचारी अपहरण गरेकोमा ६ जनाको शव भेटियो भने दुई जनाको अवस्था अज्ञात छ', गभर्नर अजिजले बताए ।
आक्रमणमा मारिएका सबै जना अफगानिस्तान कै नागरिक हुन् । आक्रमणकारीको खोज ीगर्न प्रहरीले सुरक्षा कारबाही कडा र तीव्र बनाएको सञ्चारमाध्यमले उल्लेख गरेका छन् । घटनास्थल अफगान राजधानी काबुलदेखि ३ सय ९० किलोमिटर उत्तरमा पर्छ ।
प्रतिक्रिया दिनुहोस !
