सेलिब्रेटीका नजरमा भ्यालेन्टाइन

पछिल्लो समय नेपाली समाजमा पनि मौलाएको भ्यालेन्टाइन डे अर्थात् फ्रेब्रुअरी १४ नजिकिँदैछ । प्रेममा विश्वास गर्नेहरूका लागि यो दिन विशेष मानिने भए पनि कतिपयले यसमा असहमति पनि जनाउने गरेका छन् । अविवाहित तर कसैको माया र साथको पर्खाइमा रहेकालाई भने यो दिनले विशेष अर्थ राख्नसक्छ । यिनै विषयमा केही सेलिब्रेटीका विचार यहाँ प्रस्तुत छः

धेरै आशा राख्नु हुन्न

माला लिम्बू, नायिका
प्रायः चाडपर्व मनाउन विशेष दिन छुट्याइएको हुन्छ । त्यस्तै दिनमध्येको एक दिन हो, भ्यालेन्टाइन डे । कुनै पनि स्पेसल दिनहरू राम्रो वा नराम्रो भन्ने हुँदैन । यो मान्छेको सोचमा भर पर्छ । मलाई भ्यालेनटाइनको दिन सार्वजनिक बिदाजस्तो लाग्छ । म पनि भ्यालेन्टाइन मनाउँछु । तर, त्यस्तो खतरा सेलिब्रेसन भन्ने हुँदैन । त्यस्तै, सपिङ जाने, डिनर जाने गिफट एक्सचेन्ज गरेर मनाउने गरेकी छु । भ्यालेन्टाइनलाई नराम्रो रूपमा हेर्दिनँ । तर यस दिन धेरै ठूला आशा राखिनु राम्रो होइन । ठूलो आशा राखेर चित्त दुखाउनु हुँदैन । यसपटकचाहिँ चलचित्र पर्वको छायांकन चलिरहेकाले त्यसमै व्यस्त हुन्छु ।

मेरो लागि सधैं भ्यालेन्टाइन

पूजा शर्मा, नायिका
चलचित्र ‘म यस्तो गीत गाउँछु'को छायांकनमा रहेकी पूजा शर्मा आफू कहल्यिै भ्यालेन्टाइन नमनाउने बताउँछिन् । भन्छिन्, ‘भ्यालेन्टाइन डेबारे चासो राख्दिनँ । यो बाहिरबाट आएको चलन हो । अहिलेसम्म भ्यालेन्टाइन मनाएको पनि छैन ।' माया गर्न त्यही दिन कुर्नुपर्छ भन्ने उनलाई लाग्दैन । उनलाई आफ्नै दसंै तिहारलगायतका चाडबाड मनाउन रमाइलो लाग्छ । उनलाई भ्यालेन्टाइनजस्ता बाहिरबाट आएका अन्य पर्वहरू पनि मनाउन मन लाग्दैन । मेरो लागि त सधैं भ्यालेन्टाइन । म सबभन्दा बढी कामलाई प्राथमिकता दिन्छु । भ्यालेन्टाइनको समयमा पनि प्रायः छायांकनमै हुन्छु ।

रेखा थापाले प्रपोज गरिन

कोमल ओली, गायिका
भ्यालेन्टाइन डेलाई अन्तर्राष्ट्रिय रूपमा मनाइन्छ । यसलाई हामीले रोक्न सकेनौं, नेपालमा पनि भित्रियो । हुन त यो नेपाली संस्कृति हैन तर नेपाली परम्पराअनुसार प्रेमलाई एकदमै आदर र सम्मान गर्ने संस्कार छ । हामी प्रेमलाई महत्वव दिन्छौं । हामी खुलेर प्रेम गर्न हिच्किचाउँछौं । देखिने गरी चुम्बन गर्न सक्दैनौं, सेक्सुअल अपिल हुने खालका कार्य गर्न सक्दैनौं । किनकि हाम्रो समाजमा यो स्वीकार्य छैन । तर, आजकाल युवाहरू भ्यालेन्टाइनलाई प्रेमप्रस्ताव राख्ने पर्वका रूपमा मान्न थालेका छन् । गुलाबका फूल बिक्री हुन्छन् । व्यापार बढेको छ । डेटिङ गर्ने चलन बढेको छ । पैसाको जोहो गर्नु परेको छ । पढाइमा ध्यान दिएका छैनन् । अनावश्यक खर्चले डिप्रेसन हुने गरेको छ । त्यसले यसका सकारात्मक र नकारात्मक दुवै प्रभाव छ । मचाहिँ हार्दिक प्रेममा विश्वास गर्छु । मैले एकपटक कोरियामा मनाएको भ्यालेन्टाइनको याद आउँछ । त्यति बेला रेखा थापाले मलाई प्रपोज गरेकी थिइन् ।

अर्पण थापालाई विस गर्छु

बेनिशा हमाल
अभिनेत्री बेनिशा हमाललाई अहिले भ्यालेन्टाइनले छोइसकेको छ । पहिला उनलाई त्यस्तो लाग्दैनथ्यो । मलतब हुन्थेन तर हिजोआज साथीभाइको सर्कलमै भ्यालेन्टाइनको चर्चा हुन्छ । कताकता उनलाई रमाइलो लाग्छ । माया गर्नका लागि त्यो दिन प्रेमी जोडीका लागि विशेष दिन होजस्तो लाग्छ । हुन त अन्य दिन पनि विशेष हुन्छ तर त्यो दिन अझै स्पेसल हुने उनको भनाइ छ । यसपटकको भ्यालेन्टाइमा उनी चलचित्र ब्लाइन्ड रक्सको छायांकनमा हुनेछिन् । ‘छायांकनका क्रममा मेरो साथमा नायक अर्पण थापा हुनुहुन्छ, उहाँलाई भ्यालेन्टाइन विस गर्छु', बेनिसाले भनिन् । उनको विचारमा भ्यालेन्टाइनमा प्रेमीप्रेमिकाबाट धेरै आशा राख्नु, महँगो उपहार खोज्नु राम्रो होइन । ‘यो त माया साट्ने दिन हो, उपहार हैन', उनले स्पष्ट पारिन् ।

रोज र कार्ड डस्टबिनमा फालेँ

रजनी केसी
हिजोआजका युवकयुवती केवल आकर्षणलाई प्रेम भनेर झुक्किएको बताउँछिन् नायिका रजनी केसी । उनको विचारमा उमेरमा प्रेमभन्दा उचित शिक्षा, संस्कार र सही सुझावको खाँचो हुन्छ । पछिल्लो समय प्रेममा पनि विकृति देखिएको छ । प्रेममा बदला लिन थालेका छन् । कोही आफ्नो भएन भने एसिड फ्याँक्नु प्रेम होइन । प्रेममा परिपक्व भएर सोच्नु आवश्यक हुन्छ । त्यसले उनलाई भ्यालेन्टाइन एकदमै महत्ववपुर्ण दिन लाग्छ । अरू बेला प्रस्ताव गरेको भन्दा त्यो दिन प्रस्ताव गरेको रमाइलो हुन्छ । ‘मेरो दिमागमा यो दिन स्पेसल दिन हो भन्ने छाप परेको छ', उनले भनिन् । अहिलेसम्म प्रेमसम्बन्धमा नपरे पनि कसैले प्रस्ताव राख्ने हिम्मत गर्छन् कि भनेर पर्खिरहेको उनको भनाइ छ । स्कुलमा ७ कक्षामा हुँदा प्रेमप्रस्ताव आए पनि डरले रोज र कार्ड डस्टबिनमा फालेकी थिइन् । ‘त्यो प्रेम साइलेन्टमै सकियो', उनले स्मरण गरिन् ।

मेरो विशेष मान्छे छैन् 

मेघना लामा, मिस पिंक
भ्यालेन्टाइन डेलाई पराईको संस्कृति मान्छिन् मेघना लामा । तर, नेपालमा पनि धेरैले मनाउन थालेका छन् । उनको विचारमा भ्यालेन्टाइन भनेको प्रेमीप्रेमिकाको स्पेसल दिनचाहिँ हो । ‘मेरो लागि त कोही विशेष मान्छे छैन तर पनि मेरो रेस्टुरेन्टमा धेरै जोडी आउँछन्', उनले भनिन् । वसन्तपुर क्षेत्रमा रुमल्लिएका जोडीहरू देख्दा उनलाई पनि रमाइलो लाग्छ । ‘म व्यापारमा लागेको हुँदा धेरै प्रेमिल जोडीहरू रेस्टुरेन्टमा आउँछन्', मेघनाले भनिन्, ‘तर यो दिनलाई महत्वव दिएको देख्दा अरूको संस्कृतिमा रमाएर आफ्नो संस्कृति बिर्सिरहेजस्तो लाग्छ ।'