हिमालयनको जित
गाईघाटः चौथो रमपम उदयपुर गोल्डकपअन्तर्गत शुक्रबार भएको खेलमा हिमालयन शेर्पा क्लबले जित हात पारेको छ । आयोजक उदयपुरलाई ४-१ गोलले पाखा लगाउँदै हिमालयन शेर्पाले प्रतियोगितामा पहिलो जित हात पारेको हो । खेलको ११औं मिनेटमा हिमालयन शेर्पाका सुरज हमालले गोल गर्दै टोलीलाई अग्रता दिएका थिए । त्यसको ११ मिनेटपछि उदयपुरका रामु थापामगरले गोल गर्दै खेललाई १-१ को बराबरीमा पुर्याएका थिए ।
खेल बराबरीमा ल्याएपछि हौसिएको उदयपुर आफ्नै खेलाडी लक्ष्मी पञ्जियारबाट आत्मघाती गोल भएपछि निरास बन्न पुग्यो । खेलमा लगातार दबाब बनाएको हिमालयन शेर्पाले ७९औं मिनेटमा गोल गर्दै खेल ३-१ को स्थितिमा पुर्यायो । हिमालयन शेर्पाका विदेशी खेलाडी मौसा कामागाटेले टोलीका लागि आकर्षक गोल गरेका थिए ।
त्यसपछि खेल सकिन आठ मिनेट बाँकी रहँदा हिमालयन शेर्पाका विश्वास श्रेष्ठले गोल गर्दै टोलीलाई ४-१ को फराकिलो जित दिलाए । उक्त खेलमा म्यान अफ दी म्याचको पुरस्कार हिमालयन शेर्पा क्लब विश्वास श्रेष्ठले पाए । शनिबार सशस्त्र प्रहरी बलको एपीएफ क्लब र मोरङ—११ बीच खेल हुनेछ । प्रतियोगिताको विजेताले दुई लाख रुपैयाँ पुरस्कार प्राप्त गर्नेछ ।
प्रतिक्रिया दिनुहोस !
