टर्कीको सेना सिरिया प्रवेश

बेरुतः टर्कीको सेना र ऊसँग सम्बद्ध सिरियाली विद्रोही उत्तरी सिरियामा कट्टरपन्थी इस्लामिक स्टेट (आइएस)को कब्जामा रहेको अल बाब सहरमा प्रवेश गरेका छन् । सिरियाको सरकारी सेना पनि जिहादीको गढ नजिकै पुगिसकेको छ ।

पश्चिमा समर्थित मानवअधिकारवादी संस्था सिरियन अब्जरभेटरी फर ह्युमन राइट्सले यस्तो जानकारी दिएको छ । टर्कीको सरकारी समाचार संस्था अनादोलुले पनि उक्त घटनाको पुष्टि गरेको छ । उसले अल बाब सहरमा आइएससँगको भिडन्तमा टर्कीका एक सैनिक मारिएको र एकजना गम्भीर घाइते भएको उल्लेख गरेको छ । आइएसका लडाकुलाई त्यस सहरबाट लखेट्न टर्कीको सेना र सिरियाली विद्रोहीले संयुक्त रूपमा यद्ध गरिरहेका छन् ।

ह्युमन राइट्सले टर्कीको सेना पश्चिमतर्फबाट अल बाब सहरमा प्रवेश गरेको र आइएसमाथि भीषण आक्रमण गरेको दाबी गरेको छ । उक्त सहरको पश्चिमी भूभाग टर्कीको सेनाको नियन्त्रणमा आएको छ । टर्कीको सेनाको आक्रमणबाट ६ जना मारिएका छन् । टर्कीको सेना र विद्रोही उत्तर, पूर्व र पश्चिम दिशाबाट अल बाब सहरभित्र प्रवेश गरिरहेका छन् भने सिरियाली सरकारी सेना दक्षिणबाट अगाडि बढिरहेको छ ।

यसैबीच काजकिस्तानको विदेश मन्त्रालयले शनिबार सिरियाली सरकार र विद्रोही पक्षलाई दोस्रो चरणको वार्ताका लागि जेनेभामा जानुभन्दा पहिले यसै विषयमा थप छलफल गर्न अस्तानामा आउन निमन्त्रणा पठाएको छ । अस्तानमा यही फेब्रुअरी १५ र १६ गते छलफल गर्ने गरी अस्ताना आइपुग्न सम्बद्ध पक्षलाई बोलाइएको विज्ञप्तिमा जनाइएको छ ।

रूस, टर्की र इरानको पहलमा अस्तानामा भएको पहिलो चरणको वार्ता जनवरी २३ मा बोलाइएको थियो भने दुवै पक्ष आवश्यक तयारीसाथ दोस्रो वार्तामा सहभागी हुने सहमति भएको थियो ।

दोस्रो चरणको औपचारिक वार्ताको पूर्वसन्ध्यामा हुने छलफलमा सिरियाली सरकार तथा विद्रोही पक्षबाट आफ्ना प्रतिनिधि सहभागी गराउन आग्रह गरिएको छ भने वार्तामा राष्ट्रसंका सिरियाका लागि विशेष प्रतिनिधि स्टेफेन डे मिस्टुरा र अमेरिकी पर्यवेक्षकलाई पनि आमन्त्रण गरिएको छ ।