काठमाडौं : च्याम्पियन्स लिग फुटबलको अन्तिम १६ को पहिलो लेगमा बार्सिलोना भारी अन्तरले पराजित भएको छ ।
प्रि–क्वाटरफाइनलको पहिलो लेगमा बार्सिलोना पेरिस सेन्ट जर्मेन (पिएसजी) सँग ४-० ले पराजित भएको हो। पिएसजीको जितका लागि एन्जल डि मारियाले दुई तथा जुलियन ड्रेक्सलर र एडिसन काभानीले एक एक गोल गरे ।
बार्सिलोनामाथि हावी भएको पिएसजीले खेलको १८ औँ मिनेटमा डि मारियाको गोलबाट खेलमा अग्रता लिएको थियो। ४० औँ मिनेटमा ड्रेक्सरले अर्को गोल गरेपछि पहिलो हाफमै बार्सिलोना २-० ले पछाडि परेको थियो।
दोस्रो हाफमा समेत बार्सिलोना पिएसजीमाथि कमजोर देखियो । दोस्रो हाफ सुरु भएको १० मिनेटमै डि मारियाले व्यक्तिगत दोस्रो गोल गर्दै पिएसजीलाई ३–० को अग्रता दिलाए । खेल अवधिभर दबाबमा रहेको बार्सिलोनामाथि खेलको ७१ औँ मिनेटमा काभानीले गोल गरे । अन्तत काभानीको गोलसँगै बार्सिलोनामाथि पिएसजीले ४–० को सानदार जित निकालेको हो । 
बार्सिलोनाका स्टार खेलाडी लियोनल मेसी, लुइस स्वारेज र नेइमार मैदानमै भएको खेलमा बार्सिलोना ४-० को अन्तरले पराजित हुँदा बार्सिलोनाका दर्शक समेत स्तब्ध भएका छन्। 
प्रतिक्रिया दिनुहोस !
