काठमाडौंः मणिपाल सिटी एन्ड गिल्डस्ले नेपालमा आर्क भेन्चर्स प्रालिसँगको सीपमूलक एवं व्यावहारिक तालिम आयोजना गर्ने भएको छ । संस्थाले बुधबार नेसनल कलेजमा पत्रकार सम्मेलन गरी उक्त कार्यक्रमसम्बन्धी जानकारी गराएको हो । नेपालमा विद्यमान दक्ष कामदार अभाव र बेरोजगारी अन्त्यका लागि हस्पिटालिटी, बैंकिङ, कन्सट्रक्सन, सेकुरिटी गार्ड र अंग्रेजी भाषासम्बन्धी अन्तर्राष्ट्रिय स्तरको तालिम सञ्चालनका लागि तयारी भइरहेको सम्मेलनमा जानकारी गराइएको छ ।
आर्क भेन्चर नेपालका लागि बैंकिङ, हस्पिटालिटी, निर्माण, सेक्युरिटी र अंगे्रजी भाषाका सीपमूलक तालिम सञ्चालन गर्न मणिपाल सिटी एन्ड गिल्ड्सको आधिकारिक संस्थाका रूपमा रहेको छ । २० वर्षदेखि गुणस्तरीय एवं जीवनपयोगी ज्ञान प्रदान गर्दै आइरहेको नेसनल कलेजले आर्क भेन्चर प्रालिसँगको सहकार्यमा बैकिङसम्बन्धी कोर्स सञ्चालन गर्ने जनाएको छ । उक्त कलेजले हाल काठमाडौं विश्वविद्यालयको सम्बन्धनमा डेभलपमेन्ट स्टडिज, डेभलपमेन्ट फाइनान्स र सोसल साइन्स गरी तीनवटा स्नातक तहका विषय पढाउँदै आएको छ । मणिपाल ग्लोबल एजुकेसन शिक्षणसम्बन्धी सेवा प्रदान गर्ने एक अग्रणी संस्था हो । यसले उच्च शिक्षासम्बन्धी सेवा, कर्पाेरेट तालिम, सीपमूलक तालिमका कार्यक्रम सञ्चालन गर्दै आइरहेको छ । नेपाल, भारत, मलेसिया, एन्टिगुवा र दुबईमा गरी हाल यसका ९ वटा क्याम्पस सञ्चालनमा छन् ।
प्रतिक्रिया दिनुहोस !
