बार्सिलोना विजयी

बार्सिलोनाः लियोनल मेसीले खेलको ९०औं मिनेटमा विवादास्पद पेनाल्टी अवसरमा गोल गरेपछि बार्सिलोना स्पेनिस ला लिगाअन्तर्गत आइतबार राति भएको खेलमा लेगानेसविरुद्ध २-१ गोलले विजयी भएको छ । मेसीको निर्णायक गोलसँगै बार्सिलोना साताको दोस्रो लज्जास्पद नतिजाबाट पनि जोगिएको छ ।

यसै साता युरोपियन च्याम्पियन्स लिगअन्तर्गत प्रिक्वार्टरफाइनल पहिलो लेगको खेलमा फ्रान्सेली क्लब पेरिस सेन्ट जर्मन (पीएसजी) सँग ४-० गोलअन्तरले पराजित भएको बार्सिलोना आइतबार रेलिगेसन क्षेत्र नजिकको लेगानेसविरुद्ध पनि बराबरीको अवस्थामा पुगेको थियो । यद्यपि डी बक्स क्षेत्रमा नेमारलाई फल प्रहार भएपछि प्राप्त पेनाल्टी अवसरले बार्सिलोनालाई जोगायो । प्रशिक्षक लुइस इन्रिकले टोलीको प्रदर्शनप्रति चिन्ता व्यक्त गरे ।

प्रशिक्षक इन्रिकले यो प्रदर्शनले बार्सिलोनालाई च्याम्पियन्स लिग र घरेलु स्पेनिस ला लिगाको उपाधि मुस्किल रहेको संकेत गरे । ‘हामी अहिले जुन अवस्थामा छौं, त्यो अवस्थाबाट च्याम्पियन्स लिगमा अघि बढ्न सहज छैन भन्ने अनुमान लगाएका छौं’, प्रशिक्षक इन्रिकले भने, ‘हाम्रा लागि सबै चिज मुस्किल छन् । सुरुवातमै गोल गरेर पनि सहज जित हात पार्न नसक्नुले पनि समस्या देखाएको छ । अन्त्यमा हामीलाई जितका लागि पेनाल्टीकै सहायता लिनुपर्रयो ।’

बल लिएर अघि बढिरहेका नेमारलाई पेनाल्टी क्षेत्र भित्र लेगानेसका मार्टिन मान्तोभानीले लडाएपछि रेफ्रीले बार्सिलोनालाई पेनाल्टी अवसर दिएका थिए । जसलाई सदुपयोग गरेका मेसीले आफूलाई स्पेनिस ला लिगाको सर्वाधिक गोलकर्तासमेत बनाएका छन् । मेसीको १९ गोल पुगेको छ ।

त्यसअघि बार्सिलोनाका लागि सुरुवाती गोल पनि मेसीले नै गरेका थिए । खेल सुरु भएको चौथो मिनेटमै लुइस स्वारेजको क्रसमा गोल गर्दै मेसीले बार्सिलोनालाई १-० ले अघि बढाएका थिए । तर, लेगानेसले खेललाई ७१औं मिनेटमा १-१ गोलको बराबरीमा फर्कायो । उनाई लोपेजले डी बक्सलाईबाट प्रहार गर्दै टोलीलाई बराबरीको अवस्थामा फर्काएका थिए ।

म्याड्रिडको टोली लेगानेसले बार्सिलोनाविरुद्ध निक्कै नै उत्कृष्ट प्रदर्शन गरेको थियो । खेलमा बार्सिलोनाका गोलरक्षक मार्क एन्डर स्टिजेनले लेगानेसको चारभन्दा बढी सशक्त प्रहारलाई मुस्किलले बचाएका थिए । ‘हामीले बार्सिलोनाविरुद्ध जितकै योजना बनाएर खेलेका थियौं । हामीले कम्तीमा कुनै अंक लिने योजना बनाएका थियौं’, खेलपछि लेगानेसका प्रशिक्षक एजिइर गारितानोले भने, ‘हामीले अंक लिन त सकेनौं । तर, हामीले वास्तवमै कडा प्रतिस्पर्धा गर्रयौं ।’

जितसँगै बार्सिलोना शीर्ष स्थानमा रहेको रियल म्याड्रिडसँगको दुरी एक अंकमा छोट्याउँदै स्पेनिस ला लिगा अंकतालिकाको दोस्रो स्थानमा उक्लिएको छ । तर, रियलले बार्सिलोनाको तुलनामा अझै दुई खेल खेल्न बाँकी छ । २३ खेलबाट १८ अंक बनाएको लेगानेस अंकतालिकाको १७औं स्थानमा रहेको छ । लेगानेसले बार्सिलोनाको स्टेडियम क्याम्प नाउँमा प्रतिस्पर्धा गरेको यो पहिलो पटक हो । यसै सिजन लेगानेसको मैदानमा भएको प्रतिस्पर्धामा बार्सिलोना ५-१ गोलअन्तरले विजयी बनेको थियो ।

स्पेनिस ला लिगाअन्तर्गत आइतबारको अर्को खेलमा छैटौं स्थानको भिल्लारियलले आफूभन्दा एक स्थानमाथिको रियल सोसिडाडलाई १-० गोलअन्तरले पराजित गरेको छ । सामुइल क्यास्टिलेजोले खेलको अतिरिक्त समयको पनि अन्तिम मिनेटमा गोल गरेपछि भिल्लारियलले सोसिडाडको मैदानमा जित हात पारेको हो ।

यसै साता युरोपा लिगको अन्तिम ३२ अन्तर्गत पहिलो लेगको खेलमा इटालियन क्लब रोमासँग ४-० गोलले पराजित भएको भिल्लारियलले स्पेनिस लिगमा भने जित आत्मसात् गर्रयो । जितसहित भिल्लारियल (३९) ले सोसिडाडसँगको दुरी दुई अंकमा छोट्याएको छ ।

यस्तै अन्य खेलमा सेल्टा भिगोले लिग अंकतालिकाको पुछारमा रहेको ओसासुन्नालाई ३-० तथा भ्यालेन्सियाले एथलेटिक बिलबाओलाई २-० गोलअन्तरले पराजित गरेको छ । पराजयका बाबजुद बिलबाओ २३ खेलबाट ३५ अंकसहित अंकतालिकाको आठौं स्थानमा छ । जितपछि सेल्टा २२ खेलबाट ३३ अंकसहित नवौं स्थानमा पुगेको छ भने भ्यालेन्सिया २३ अंकसहित १५औं स्थानमा छ ।