प्रधामन्त्री-चिनियाँ राजदूत भेटघाट, स्थानीय निर्वाचन बारे कुराकानी

काठमाडौं: प्रधानमन्त्री पुष्पकमल दाहाल र नेपालका लागि चीनियाँ राजदूत यु होङले बीच भेटघाट भएको छ । मंगलबार बिहान प्रधानमन्त्री निवास बालुवाटारमा भएको भेटमा प्रधानमन्त्री र राजदूत होङबीच स्थानीय निर्वाचन र नेपालको पूर्वाधार विकासका विषयमा कुराकानी भएको प्रधानमन्त्रीको नीजि सचिवालयले जानकारी दिएको छ ।

भेटमा प्रधानमन्त्रीले नेपालको पूर्वाधार विकासको क्षेत्रमा चीनले गरेको सहयोगकालागि धन्यवाद दिँदै विकासका क्षेत्रमा चीनको थप सहयोग रहने विश्वास व्यक्त गरे । प्रधानमन्त्रीले नेपाल र चीनबीच 'कनेक्टिभिटी' पूर्वाधार विकास र पूर्व सम्झौताहरुको कार्यान्वयन प्रभावकारी रुपमा अगाडि बढिरहेको बताउनु बताए ।

प्रधानमन्त्रीले सरकार स्थानीय तहको निर्वाचन सम्पन्न गरी संविधान कार्यान्वयनलाई मूर्त रुप दिने प्रक्रियामा रहेको बताउँदै त्यसकालागि चीनको सकारात्मक सहयोग रहने विश्वास व्यक्त गरे । भेटमा प्रधानमन्त्रीले 'वान बेल्ट, वान रोड' अन्तर्गतका विकासका कार्यक्रमहरु अगाडि बढ्ने विश्वास समेत व्यक्त गरे ।

भेटमा चीनियाँ राजदूत होङले नेपाल र चीनबीचको सम्बन्ध सुमधुर रहेको बताउँदै नेपालको पूर्वाधार विकासका कार्यक्रमहरु सकारात्मक रुपमा अगाडि बढिरहेको र आगामी दिनमा थप तीब्रता दिइने बताएका छन्।

नेपालको राजनीतिक र संविधान कार्यान्वयनको प्रक्रिया सकारात्मक दिशामा अगाडि बढेको बताउँदै होङले त्यसमा चीनको सदैव सद्भाव रहने जानकारी दिईन्।