काठमाडौः सरकारले काठमाडौंमा आयोजना गर्न लागेको ‘लगानी सम्मेलन' को तयारी पूरा भएको छ । उद्योग मन्त्रालयले लगानी बोर्डसँगको सहकार्यमा बिहीबार र शुक्रबार सोल्टी होटेलमा सम्मेलन गर्दैछ ।
सम्मेलनमा स्वदेशी तथा विदेशी लगानीकर्ताको सहभागिता हुनेछ । सरकारी तहबाट २५ वर्षपछि लगानी सम्मेलन हुन लागेको हो । सम्मेलनमा दुई दर्जन मुलुकबाट झण्डै अढाई सय लगानीकर्ताले सहभागिताको प्रतिबद्धता जनाएका छन् ।
सम्मेलनमा विदेशी र स्वदेशी गरी आठ सयभन्दा बढीले रजिस्ट्रेसन गरिसकेको लगानी बोर्डका प्रमुख कार्यकारी अधिकृत (सीईओ) महाप्रसाद अधिकारीले जानकारी दिए । ‘डेढ सयको हाराहारीमा विदेशी लगानीकर्ता आउने अनुमान गरेका थियौं, अढाई सय पुगिसकेका छन्', उनले भने, ‘स्वदेशी उद्यमी व्यवसायीको पनि उल्लेख्य सहभागिता हुने देखिएको छ ।'
सम्मेलनको उद्घाटन सत्रमा एसियाली पूर्वाधार लगानी बैंकका अध्यक्ष जीन लिक्वीन प्रमुख वक्ता हुनेछन् । भारतीय अर्थमन्त्री अरुण जेट्ली पनि सम्मेलनमा आउन लागेको सीईओ अधिकारीले बताए । ‘भारतीय अर्थमन्त्री नेपाल आउने समय तय भइसकेको छैन्, त्यसैले सम्मेलनको कुन सेसनमा सम्बोधन गर्ने भनेर यकिन भइसकेको छैन', उनले भने ।
सम्मेलनमा सबैभन्दा बढी चीनबाट सहभागी हुँदैछन् । चीनबाट ८९ जनाको प्रतिबद्धता आइसकेको छ । भारतबाट २१, श्रीलंकाबाट २०, मलेसियाबाट १४, जापानबाट १५, क्यानडाबाट १२ र हङकङबाट १० जना लगानीकर्ता सहभागी हुन लागेको उद्योग मन्त्रालयले जानकारी दिएको छ ।
डेढ सयको हाराहारीमा विदेशी लगानीकर्ता आउने अनुमान गरेका थियौं तर अढाइ सय पुगिसकेका छन् । स्वदेशी उद्यमी व्यवसायीको पनि उल्लेख्य सहभागिता हुने देखिएको छ । महाप्रसाद अधिकारी, प्रमुख कार्यकारी अधिकृत, लगानी बोर्ड
लगानी सम्मेलनमा भाग लिने पाहुना धमाधम नेपाल आउन थालेको सीईओ अधिकारीले बताए । ‘कतिपय विदेशी लगानीकर्ता नेपाल आइसकेका छन्, कतिपय आउँदैछन्' उनले भने, ‘सम्मेलनमा विदेशी लगानीको उल्लेख्य सहभागिताले हौसाएको छ ।'
दुई दिनसम्म चल्ने सम्मेलनको पहिलो दिन नेपालमा लगानी सम्भवना र अवसरका बारेमा छलफल हुनेछ । सरकारले लगानीसँग जोडिएका नीति तथा ऐनको बारेमा सहभागीलाई जानकारी गराउने छ । साथै, नेपालमा लगानी गरेका विदेशी लगानीकर्ताले आफ्नो अनुभव सेयर गर्नेछन् । नेपालमा लगानीको अवसर र वातावरण दुवै भएको सन्देश विदेशी लगानीकर्तामाझ फैलाउने उद्देश्य राखिएको छ । नेपाली उद्यमी, डेभलपमेन्ट पार्टनर, गैरआवासीय नेपालीले पनि सम्मेलनमा आफ्नो अनुभव आदानप्रदान गर्नेछन् ।
सम्मेलनको दोस्रो दिन ऊर्जा, पूर्वाधार, पर्यटन, सूचना प्रविधि, वित्तीय क्षेत्र, खानी तथा खनिज, कृषि तथा वनजन्य क्षेत्रसँग सम्बन्धित विभिन्न नौवटा विषयगत सत्रहरुमा छुट्टा÷छुट्टै कार्यपत्र प्रस्तुत गरिने भएको छ । साथै, लगानीको सम्भावना भएका प्रमुख क्षेत्रको क्षेत्रगत विवरण प्रस्तुत हुनेछ । सम्मेलनमा स्वदेशी र विदेशी लगानीकर्तामाझ विभिन्न विषयमा ‘प्यानल डिस्कसन' हुनेछ ।
प्रतिक्रिया दिनुहोस !
