नेवानिको प्रमुख आम्दानी ग्राउन्ड ह्यान्डलिङ

काठमाडौंः नेपाल वायु सेवा निगमको आम्दानीको प्रमुख स्रोत ग्राउन्ड ह्यान्डलिङ देखिएको छ । निगमले चालू आर्थिक वर्ष २०७३/७४ को सात महिनामै १३ करोडभन्दा बढी नाफा आर्जन गरेको छ । यसको प्रमुख स्रोत ग्राउन्ड ह्यान्डलिङ हो । संस्कृति, पर्यटन तथा नागरिक उड्डयन मन्त्री जीवनबहादुर शाहीले आइतबार संसद्को सार्वजनिक लेखा समितिमा चालू आवमा निगमले १३ करोड रुपैयाँभन्दा बढी नाफा गरेको जानकारी गराए । यो नाफा अन्य वर्षभन्दा धेरै भएको उनको दाबी छ ।

निगमले आर्थिक वर्ष २०७०/७१ मा दुई करोड, २०७१/७२ मा एक करोड ५० लाख र आर्थिक वर्ष २०७२/७३ मा चार करोड नाफा गरेको थियो । तर, चालू आर्थिक वर्षको सात महिनामै १३ करोड ७१ लाख रुपैयाँभन्दा बढी नाफा गरेको शाहीले बताए । यसमा निगमले अपरेसनबाट पाँच अर्ब चार करोड २० लाख ८६ हजार रुपैयाँभन्दा बढी संकलन गरेको छ । यस्तै निगमको अपरेसन खर्च चार अर्ब ४३ करोड १२ लाख ९९ हजार रुपैयाँभन्दा बढी छ ।

आम्दानी रकमबाट निगमको खर्च घटाउँदा ६१ करोड सात लाख ८६ हजार रुपैयाँ रहन आउँछ । त्यसमा पनि निगमको वित्तीय शुल्कमा बापतको ४७ करोड ३६ लाख ६० हजार रुपैयाँ घटाउँदा निगमको नाफा १३ करोड ७१ लाखभन्दा बढी रहेको मन्त्री शाहीले जानकारी दिए । निगमले अन्तर्राष्ट्रिय यात्रुबाट तीन अर्ब र ग्राउन्ड ह्यान्डलिङ बापत एक अर्ब ७६ करोड रुपैयाँभन्दा बढी आम्दानी गरेको छ । तर, निगमको उडानमा सबैभन्दा बढी एक अर्ब ७० करोड रुपैयाँ र प्रशासन तथा सामान्य खर्चमा एक अर्ब ३६ करोडभन्दा बढी खर्च भएको देखिन्छ ।

निगमले चालू आर्थिक वर्ष २०७३/७४ को सात महिनामै १३ करोडभन्दा बढी नाफा आर्जन गरेको छ ।

मन्त्री शाहीले दिएको नाफा विवरणमा समितिका सदस्य राजन केसी र धनराज गुरुङलगायतले आलोचना गरेका छन् । केसीले निगमले ग्राउन्ड ह्यान्डलको रकमलाई लिएर आफू फाइदामा गएको भन्न नमिल्ने भन्दै मन्त्री र सचिवसँग प्रश्न गरेका थिए । ग्राउन्ड ह्यान्डलिङ अन्य कुनै निजी कम्पनीको हातमा गएको अवस्थामा निगम घाटामा जानेछ ।

व्यवसायी योजना बिना नै एयर बस खरिदको तयारी

नेपाल वायु सेवा निगमले व्यावसायिक योजना बिनै दुईवटा एयर बस खरिद गर्न लागेको भन्दै सार्वजनिक लेखा समितिले निगमका प्रबन्धक, मन्त्रालयका सचिव र मन्त्रीलाई एक महिना भित्रै स्पष्ट योजना पेस गर्न निर्देशन दिएको छ । निगमले अहिले बनाएको योजनाबाट निगम फाइदाभन्दा घाटामा जाने सांसदको आरोप छ । साथै, मन्त्रालयलाई वाइडबढी खरिद प्रक्रियामा आर्थिक हिमामिना भएको भन्ने उजुरीका विषयमा सत्यतथ्य विवरणसहितको लिखित जवाफ पाँच दिनभित्र पेस गर्न समितिले निर्देशन दिएको छ । समितिका सदस्य धनराज गुरुले बिना योजना जहाज खरिदका लागि कम्पनी छनोट र बैना रकम पठाउनुले शंका उत्पन्न भएको बताए । ‘निगम सँधै घाटामा जाने र सेतो हात्तीमा परिणत भएको देख्न नपरोस्' , गुरुङले भने । निगमका प्रमुख सुगतरत्न कंसाकारले सबै काम योजना, ऐन र नियमावलीअनुसार रहेको दाबी गरे ।

तीन दिनभित्रै रणनीतिक साझेदारीको निर्णय

लामो समयदेखि निगमको व्यवस्थापन कमजोरी कै करण राष्ट्रिय ध्वाजवाहक ध्वस्त हुने अवस्थामा पुगेको भन्दै सांसदहरूले रणनीतिक साझेदारी भित्व याउने कार्य ढिला हुनुको कारण सोधेका थिए । मन्त्री शाहीले अबको तीन दिने भित्रै रणनीतिक राझेदारीका लागि ग्लोबल टेन्डर गरिने जनाकारी दिएका छन् । ‘प्रस्ताव आवेदनका लागि बनेको फाइल सचिवकोमा आइतबार बेलुका नै आएपुग्छ' , शाहीले भने, ‘त्यसपछि आफूकहाँ फाइल आउन साथ हस्ताक्षर गरेर ग्लोबल प्रस्ताव आवेदनको सूचना प्रकाशन हुन्छ ।' नेपाल वायु सेवा निगमले आगामी दुई महिनाभित्रै अनलाइन टिकट प्रणाली सुरु गर्ने भएको छ । समितिको बैठकमा यो जानकारी दिइएको हो ।

नेपालगन्ज र विराटनगरबाट दुर्गममा उडान

पाइलट अभावले दुर्गम क्षेत्रमा उडान गर्न नसकेको निगमले अब भने विराटनगर र नेपालगन्जलाई बेस बनाएर दुर्गम क्षेत्रमा उडान सुरु गर्ने भएको छ । मन्त्री शाहीका अनुसार अहिले अमेरिकामा तालिम लिँदै गरेको तीन जना फाइलट एक महिनाभित्रै नेपाल आउनेछन् । त्यसपछि निगमले दुर्गममा पनि उडान सुरु हुनेछ ।