जर्मन फुटबलर पोडोलस्कीको सुखद बिदाइ

म्युनिख : लुकास पोडोलस्कीले आफ्नो अन्तिम खेलमा उत्कृष्ट प्रदर्शन गरेपछि विश्व विजेता जर्मनीले इङ्ल्यान्डलाई पराजित गरेको छ । जर्मन टोलीबाट अन्तिम खेल खेल्दै सन्न्यास लिएका पोडोलस्कीले गोल गरेपछि बुधबार राति भएको अन्तर्राष्ट्रिय मैत्रीपूर्ण खेलमा जर्मनीले इङ्ल्यान्डलाई १-० ले पराजित गरेको हो । घरेलु मैदानमा भएको खेलमा जर्मनीलाई पहिलो हाफमा इङ्ल्यान्डले गोलरहित बराबरीमा रोकेको थियो । पहिलो हाफमा दुवै टोलीले लगातार आक्रमण गरे पनि सफल हुन सकेनन् ।

निकै प्रतिस्पर्धात्मक खेलको निर्णय दोस्रो हाफमा भएको थियो । दोस्रो हाफको ६९औं मिनेटमा जर्मन राष्ट्रिय टोलीबाट अन्तिम खेल खेलेका पोडोलस्कीले गोल गर्दै टोलीलाई जित दिलाएका थिए । ३१ वर्षीया प्रभावशाली स्ट्राइकर पोडोलस्कीले टोलीलाई जित दिलाएर आफ्नो बिदाइलाई समेत सुखद बनाए । 'यो खेल मेरा लागि चलचित्र जस्तो भयो । भगवान्ले मलाई बलियो बायाँ खुट्टा दिनुभयो र मैले त्यही खुट्टाको प्रयोग गरें', पोडोलस्कीले खेलपछि भने 'मेरा लागि ठूलो खेल, ठूलो नतिजा र बिदा लिने ठूलो अवसर मिल्यो ।'

अन्तर्राष्ट्रिय फुटबलबाट सन्न्यास लिएका पोडोलस्कीले इङ्ल्यान्डविरुद्धको खेलमा कप्तानी सम्हालेका थिए । बोरुसिया डर्टमन्डको रंगशालामा भएको खेलमा उनको बिदाइ पनि भव्य बनेको थियो । उनका लागि मैदानमै विशेष कार्यक्रमको आयोजना गरिएको थियो । सन् २००४ मा जर्मनीको राष्ट्रिय टोलीबाट डेब्यु गरेका पोडोलस्कीले जर्मनीबाट एक सय ३० खेल खेल्दै ४९ गोल गरेका छन् ।

सन् २०१४ को विश्वकप जित्दाका महत्वपूर्ण खेलाडी रहेका उनले सन् २००६ को विश्वकपमा बेस्ट योङ प्लेअरको अवार्डसमेत जितेका थिए । सन् २०१८ को विश्वकप छनोटको तयारीका लागि विश्व विजेता जर्मनी र इङ्ल्यान्डबीचको मैत्रीपूर्ण खेलको आयोजना गरिएको थियो । छनोट चरणअन्तर्गत आइतबार जर्मनीले अजरबैजानको सामना गर्नेछ ।

यसैगरी विश्वक पक छनोट अन्तर्गत एसियालली देशको समुह 'ए' को तेस्रो चरणको छनोट खेलमा चीनले दक्षिण कोरियालाई १-० गोलले हराएको छ । चीनका लागि दवाओ युले ३४ औं मिनेटमा गरेको गोल नै निर्णायक बनेको थियो ।