फिल्मी सिटीका लागि जग्गा 

चरीकोटः दोलखाको रमणीयस्थल डाँङढुंङेडाँडामा निर्माण हुन लागेको चलचित्र नगरी (फिल्म सिटी) का लागि जग्गा प्राप्त भएको छ । विभिन्न बाधा र प्रक्रियाका कारण ६ वर्षको प्रयत्नपछि जग्गा प्राप्त भएको चलचित्र नगरी निर्माणका अभियन्ता एवं कलाकार मदनदास श्रेष्ठले जानकारी दिए ।

जग्गा प्राप्तिको पत्र लिएर दोलखा आएका श्रेष्ठले जिल्लावासीका लागि यो ठूलो उपलब्धि भएको बताए । चलचित्र नगरी निर्माण हुन नदिन विभिन्न चलखेल भएको बताउँदै लामो संघर्षपछि जग्गा प्राप्त भएकाले अब निर्माणको ढोका खुलेको बताए । चलचित्र नगरी निर्माणका लागि राष्ट्रिय वन क्षेत्रको ७६.२५ हेक्टर जग्गा प्रयोग गर्न दिने र सोही स्थानमा रहेका एक सय चारवटा रूखबिरुवा हटाउन स्वीकृति दिएको छ । मन्त्रिपरिषद्को स्वीकृतिलगत्तै २०७३ चैत १५ गते वन विभाग र चलचित्र विकास बोर्डबीच सम्झौतासमेत भएको छ ।

चलचित्र नगरी निर्माणका लागि सूचना तथा सञ्चार मन्त्रालयअन्तर्गत चलचित्र विकास बोर्डलाई चलचित्र नगरी आयोजना निर्माण एवं सञ्चालनका लागि लिखित निर्देशन दिएसँगै निर्माणको बाटो खुला भएको र अब यो योजना कसैले रोक्न नसक्ने उनले बताए । सरकारले चलचित्र नगरी निर्माणको लागि छुट्टै परियोजना बनाउन सके अझ छिटो निर्माण गर्न सकिने अभियनता श्रेष्ठको भनाइ छ ।

चलचित्र नगरी गुरुयोजना निर्माणका लागि तयारी भइरहेको उनको भनाइ छ । सो क्षेत्रमा सडक र बिजुलीबत्तीको काम भइरहेको छ । चलचित्र नगरी निर्माणका लागि १५ अर्ब रुपैयाँभन्दा बढी रकम आवश्यक पर्ने बताउँदै श्रेष्ठले यसका लागि नर्बे सरकार र चीन सरकारले चासो देखाइरहेको जानकारी दिए।

डाँङडुंगेडाँडामा निर्माण हुन लागेको चलचित्र नगरी विश्वको सबैभन्दा बढी स्थानमा रहेको चलचित्र नगरी हुने छ । फरक शैलीको चलचित्र नगरी बन्ने यो स्थान काठमाडौंबाट लगभग एक सय नौ किमि पूर्वमा पर्छ । चलचित्र नगरी रहने डाँङडुंगेडाँडाबाट काठमाडौंको स्वयम्भू, फुलचोकी, रोल्वालिङ हिमशृंखला, गौरीशंकर, जुगल, गणेश हिमालका साथै सिन्धुपाल्चोक, काभ्रेपलाञ्चोक, सोलुखुम्बु, रामेछाप तथा ओखलढुंगा जिल्लाको ६० प्रतिशत भूभाग दृश्यावलोकन गर्न सकिन्छ ।