रूपन्देही च्यालेन्जर्स शीर्ष स्थानमा
धनगढीः धनगढीमा जारी धनगढी प्रिमियर लिगअन्तर्गत पाँचौं दिनको खेलमा रूपन्देही च्यालेन्जर्स र सीवाईसी अत्तरिया विजयी भएका छन् । शुक्रबारको पहिलो खेलमा रूपन्देहीले काठमाडौं गोल्डेन्सलाई १५ रनले पराजित गर्दै प्रतियोगितामा लगातार तेस्रो जित हात पारेको छ । शुक्रबारै भएको दोस्रो खेलमा धनगढी टिम चौराहलाई ४० रनले हराउँदै अत्तरिया अंकतालिकामा दुई स्थानमाथि उक्लिएको हो ।
लगातार तीन जित हासिल गरेको रूपन्देही च्यालेन्जर्स अंकतालिकाको शीर्ष स्थानमा कायमै छ । हारपछि गोल्डेन्स चार खेलमा दुई जित र दुईमा बेहोर्दै दोस्रो स्थानमा छ । त्यस्तै दोस्रो जित हात पार्दै अत्तरिया अंकतालिकाको तेस्रो स्थानमा उक्लिएको छ । दुई हार दुई जितपछि समान चार अंक भए पनि रनरेटका आधारमा काठमाडौं दोस्रो स्थानमा रहँदा अत्तरिया तेस्रो भएको हो । लगातार तीन खेल गुमाएको धनगढी टिम चौराह अंकविहीन छ ।
चार अंक रहेको विराटनगर किंग्स रनरेट कम भएका कारण चौथो स्थानमा रहेको छ भने एक खेल जितेर दुई अंक रहेको कञ्चनपुर आइकोनिक अंकतालिकाको पाँचौं स्थानमा छ । शुक्रबार भएको पहिलो खेलमा सेती अञ्चल प्रहरी मैदानमा टस जितेर ब्याटिङ रोजेको रूपन्देहीले निर्धारित २० ओभरमा नौ विकेटको नोक्सानीमा एक सय ३५ रन बनायो ।
उसका लागि नूरधोज सेनले सर्वाधिक २२ बलमा ३७ रन तथा पुष्प थापाले ३६ रन बनाए । रूपन्देहीका लागि शंकर रानाले १६ रन, प्रकाश केसीले १२ रन र विक्रम सोबले १० रन बनाए । काठमाडौं गोल्डेन्सका सोमपाल कामीले चार विकेट लिए । यस्तै मञ्जित श्रेष्ठ, वसन्त रेग्मी र सन्तोष भट्टले एकएक विकेट लिए ।
एक सय ३६ रनको लक्ष्य पछ्याएको काठमाडौं गोल्डेन्सले २० ओभर नौ . विकेटको नोक्सानीमा एक सय २० रनमात्रै बनाउन सकेपछि १५ रनको हार बेहोर्यो । गोल्डेन्सका ब्याट्सम्यान सुमित महर्जनले सर्वाधिक २७ बनाए । रूपन्देहीका शक्ति गौचनले तीन, विक्रम सोब र कृष्ण कार्कीले दुईदुई विकेट लिए । खेलको म्यान अफ दी म्याच रूपन्देहीका पुष्प थापाले नगद १० हजार हात पारे ।
दोस्रो खेलमा टस जितेर पहिले ब्याटिङ गर्दै अत्तरियाले निर्धारित २० ओभरमा चार विकेटको क्षतिमा एक सय ४२ रन बनायो । अत्तरियाका लागि रोन नेपालीले सर्वाधिक ३२, योगेन्द्र कार्कीले २७, प्रदीप ऐरीले २६ र करन केसीले २५ रन बनाए । चौराहका लागि सौरव खनालले २ विकेट तथा आरिफ सेख र सुसन भारीले एकएक विकेट लिए ।
जितका लागि एक सय ४३ रनको लक्ष्य पछ्याएको चौरहाले २० ओभरमा नौ विकेट गुमाउँदै एक सय दुई रनमात्रै बनाउन सक्यो । उसका लागि रामनरेश गिरीले ३९ रन बनाए । सौरव खनालले २३ र अनिल मण्डलले १९ रन बनाए । कप्तान पारस खड्कासहित चारजना खेलाडी शून्यमा आउट भए । अत्तरियालाई जिताउनका लागि मेहबुब आलम र सुरेन्द्र चन्दले समान तीन विकेट लिए । यस खेलकोे म्यान अफ दी म्याच अत्तरियाका मेहबुब आलमले नगद १० हजार हात पारे ।
प्रतियोगिताअन्तर्गत शनिबारको पहिलो खेलमा विराटनगर किग्स र कञ्चनपुर आइकोनिक तथा दोस्रो खेलमा काठमाडौं गोल्डेन र धनगढी टिम चौराहबीच प्रतिस्पर्धा हुनेछ ।
प्रतिक्रिया दिनुहोस !
