गल्छी-रसुवागढी सडकलाई डेढ अर्ब
विदुर : बहुचर्चित गल्छी-रसुवागढी सडकको लागि सरकारले डेढ अर्ब रुपैयाँ बजेट छुट्याएको छ । त्रिदेशीय मार्ग बनाउने उद्देश्यले नेपाल-भारत-चीन जोड्ने छोटो मार्गको रूपमा सरकारले पृथ्वीराजमार्गको गल्छीबाट नुवाकोटको विदुर हुँदै रसुवागढी जोड्ने उत्तर-दक्षिण सडकलाई एक अर्ब ४० करोड ७५ लाख चार हजार रुपैयाँ विनियोजन गरेको छ ।
सरकारले साढे दुई वर्षभित्र गल्छीदेखि चीनको केरुङसम्म सीमा जोडिएको सो सडक डबल लेनको पक्की बनाउने योजनासहित ठूलो रकम विनियोजन गरेको हो । अघिल्लो सरकारले चालू आर्थिक वर्षका लागि सो सडकलाई एक अर्ब २० करोड ३० लाख ६० हजार रुपैयाँ विनियोजन गरेको थियो ।
सोही बजेटअनुसार हाल ठेक्का लागेर धमाधम काम अगाडि बढिरहेको छ । त्रिशुली-मैलुङ-स्याफ्रुबेसी-रसुवागढी सडकलाई डबल लेनको पक्की सडकका रूपमा आगामी साढे दुई वर्षभित्र केरुङ जोड्ने गरी सडक विभागले विभिन्न खण्डमा विभाजन गरेर धमाधम काम गरिरहेको छ ।
त्यसका लागि सडक विभाग, नेपाली सेना र चीन सरकारको संयुक्त प्रयासमा काम भइरहेको छ । सडक विभागले धादिङको गल्छीदेखि रसुवाको मैलुङसम्मको ४६ किलोमिटर सडकलाई डबल लेनमा स्तरोन्नति गर्दै कालोपत्रे बनाउन ठेक्का लगाइसकेको छ ।
तीन अर्ब लागतमा गत असोजमै तीनवटा कम्पनीले ठेक्का लिएर काम अघि बढाइएको गल्छी-विदुर-स्याफ्रुबेसी-रसुवागढी सडक निर्माण आयोजनाले जनाएको छ । मैलुङदेखि स्याफ्रुबेसीसम्मको १३ किलोमिटर सडकमा नेपाली सेनाले ट्रयाक खोल्ने तथा स्तरोन्नतिको काम गरिरहेको छ ।
स्याफ्रुबेसीदेखि रसुवागढीसम्मको १६ किलोमिटर सडक चीन सरकारले शतप्रतिशत अनुदानमा बनाइदिने भनेको छ । सडक विभागले गल्छीदेखि नुवाकोटको विदुर हुँदै मैलुङसम्मको ४६ किलोमिटर सडक आगामी डेढ वर्षभित्रै डबल लेनको कालोपत्रे बनाइसक्नेछ ।
नेपाली सेनाले मैलुङ-स्याफ्रुबेसी खण्डको १३ किलोमिटर क्षेत्रलाई आगामी ६ महिनाभित्रै ट्रयाक खोलेर डबल लेनको बनाउने सेनाका प्रवक्ता झंकरबहादुर कडायतले जानकारी दिनुभयो । सेनाले काम सम्पन्न गरेको डेढ वर्षभित्रै सो खण्डलाई पनि कालोपत्रे गरिसक्ने योजनासहित काम अघि बढिरहेको डिभिजन सडक कार्यालय नुवाकोटले जनाएको छ ।
स्याफ्रुबेसीदेखि रसुवागढीसम्मको १५।५ किलोमिटर सडक भने चीन सरकारले निर्माण गरिदिनेछ । बढीमा साढे दुईवर्षभित्र काठमाडौंबाट चीनको केरुङसम्म डबल लेनको पक्की सडक पुग्नेछ ।
चीनले रसुवागढी नाकादेखि केरुङसम्मको २५ किलोमिटर खण्डमा अहिले नै डबल लेनको पक्की सडक निर्माण सम्पन्न गरेर सञ्चालन गरिरहेको छ । रसुवागढी काठमाडौदेखि एक सय ५२ किलोमिटर उत्तरमा छ ।
प्रतिक्रिया दिनुहोस !
