जर्मन राजदूत कार चढेर स्वदेशतर्फ

काठमाडौं :  विदेशी राजदूत हजारौं किलोमिटर कार चढेर आफ्नो मुलुक फर्कन लागेको सुन्दा धेरैलाई अनौठो लाग्न सक्छ । नेपालमा तीन वर्ष सेवा गरेका जर्मन राजदूत कारमा स्वदेश फर्कने तयारी गरेका छन् ।

जर्मन राजदूत माथियस मायर तीनवर्षे कार्यकाल सकेर शनिबार स्वदेश फर्कंदै हुनुहुन्छ । ११ हजार किलोमिटरभन्दा बढीको दूरी कारमा चढेर स्वदेश फर्कने योजना रहेको उहाँले सुनाउनुभयो । नेपालमा कार्यकाल सकेपछि कार चढेर स्वदेश फर्कने सम्भवतः पहिलो राजदूत जर्मन राजदूत मायर हुनुहुनेछ ।

योजनाअनुसार शनिबार बिहान ४ बजे ज्ञानेश्वरस्थित जर्मन दूतावासबाट उहाँको कार यात्रा सुरु हुनेछ । दूतावास परिसरमा उहाँको यात्राका लागि मित्सुबिसी कार तयारी हालतमा राखिएको छ । एक जर्मन साथी र आफूले आलोपालो कार हाँक्ने उहाँले सुनाउनुभयो ।

काठमाडौंबाट सुरु हुने उहाँको यात्रा भगवान गौतम बुद्धको जन्मस्थल लुम्बिनी पुगेर एकरात बिताएपछि दोस्रो दिन महेन्द्रनगर पुग्नेछ । ‘नेपालका मन पर्ने स्थानमा लुम्बिनी पनि एक हो । धेरैपटक लुम्बिनी पुगेर बसेको छु । अर्को ठाउँ मुस्ताङ हो', उहाँले भन्नुभयो ।

महेन्द्रनगरमा एकरात बिताएर सोमबार भारत प्रवेश गर्ने तयारीमा राजदूत मायर हुनुहुन्छ । ‘लामो दूरीको यात्रा गर्ने मेरो सोख हो', राजदूत मायरले भन्नुभयो, ‘मेरो कार यात्राका लागि सबै तयारी भइसकेको छ । आशा छ, यात्रा रमाइलो हुनेछ ।' भारतपछि पाकिस्तानको बलुचिस्तान पुगेर रात बिताउने उहाँको योजना छ ।

पाकिस्तानमा उहाँलाई त्यहाँको सेनाले ‘एस्कर्ट' गर्नेछ । इरान, टर्की, अर्मेनिया, ग्रिस, इटली, स्विजरल्यान्ड हुँदै ह्यामवर्ग, जर्मनीमा रहेको आफ्नो घर पुगेर राजदूत मायरको यात्रा टुंगिनेछ । ती मुलुक हुँदै कार यात्रा गर्न उहाँले भिसा लिइसक्नुभएको छ । अफ्रिकी मुलुक लिवियामा राजदूत हुँदा मायरले सहारा मरुभूमिको लामो यात्रा कारमै गर्नुभएको थियो । ‘लामो दूरीको कार यात्रा गर्नु मेरो एउटा सोख नै हो । विदेश सेवाको अन्त्यमा सबैभन्दा लामो कार यात्रा हुँदै छ', उहाँले उत्साहित हुँदै भन्नुभयो ।

जर्मन राजदूत माथियस मायरको कार यात्रा नेपाल, भारत, पाकिस्तान, इरान, टर्की, अर्मेनिया, ग्रिस, इटली, स्विजरल्यान्ड हुँदै जर्मनी पुगेर टुंगिने ।

राजदूत मायरले परराष्ट्र मन्त्रालयका शिष्टाचार अधिकारीलाई आफू कारमा स्वदेश फर्कन लागेको सुनाउँदा उनीहरू छक्क परेको अनुभव सुनाउनुभयो ।
‘कार चढेर स्वदेश फर्कने मेरो योजना सुनाउँदै गर्दा उहाँहरू छक्क पर्नुभयो', राजदूत मायरले भन्नुभयो । स्वदेश फर्कनु एक दिनअघि उहाँलाई परराष्ट्रले बिदाइ गर्दै छ ।

मायरले आफ्नै निवासमा बुधबार पत्रकारसँग नेपाल बसाइका अनुभव बाँड्दै हुनुहुन्थ्यो । नेपाल बसाइमा सबैभन्दा चुनौतीपूर्ण कुरा के लाग्यो भन्ने प्रश्नमा राजदूत मायरले भन्नुभयो, ‘दिनहुँ यहाँ हुने कार्यक्रममा सहभागी हुनुपर्ने । खानपिन नै नियन्त्रण गर्न सकिनँ । हेर्नुस् त मेरो पेट बढेर यति ठूलो भइसक्यो ।'

नेपालको दाल, भात, तरकारी र ममः सधैं सम्झिरहने उहाँले सुनाउनुभयो । नेपालीको अतिथि सत्कार गर्ने चलन, यहाँको विविधतायुक्त संस्कृतिले आफूलाई भित्रैदेखि छोएको उहाँले स्मरण गर्नुभयो । ३७ वर्षे विदेश सेवा मायरको नेपालबाटै पूरा हुँदै छ । ‘अवकाश लिए पनि म नेपाल आउनेछु । नेपाललाई सम्झिरहनेछु', उहाँले भन्नुभयो ।

नेपालको पुनर्निर्माणमा जर्मनीलगायत विदेश मुलुकले सहयोग गरे पनि पुनर्निर्माण प्रक्रियाले अपेक्षाकृत गति लिन नसकेकोमा उहाँले असन्तुष्टि व्यक्त गर्नुभयो ।

तीनवर्षे कार्यकाल सकेर शनिबार स्वदेश फर्कने तयारीमा रहनुभएका जर्मन राजदूत माथियस मायर ११ हजार किलोमिटरभन्दा बढीको दूरी कारमा चढेर स्वदेश फर्कने योजनामा हुनुहुन्छ ।

‘हामीलगायत विदेशी मुलुकका जनताको करबाट आएको सहयोग नेपालले पुनर्निर्माणमा राम्रोसँग प्रयोग गर्न सक्नुपर्ने थियो । तर, यहाँका सरकारी एजेन्सीबाट पुनर्निर्माण सहयोग गर्नुपर्ने भनियो । जुन रकम छिटो-छरितो र राम्रोसँग उपयोग हुन सकिरहेको छैन', उहाँले भन्नुभयो ।

जर्मनी संघीयताको सफल अभ्यास गरिरहेको मुलुक रहेको बताउँदै नेपालमा पहिलो चरणको निर्वाचनमा जनताको उल्लेख्य सहभागितासहित सम्पन्न भएको र संघीयताको सफल कार्यान्वयन अघि बढेकोमा उहाँले खुसी व्यक्त गर्नुभयो ।

नेपालको संघीयता कार्यान्वयन, स्थानीय निकायमा बजेट वितरण, स्थानीय तहसम्म राज्यका स्रोत-साधनको पर्याप्ततालगायत विषय चुनौतीपूर्ण भए पनि संघीयताको अभ्यासका क्रममा नेपालले सिक्दै सहज कार्यान्वयन गर्दै जाने विश्वास उहाँको थियो ।

‘नेपालको संविधान कार्यान्वयन, स्थिरता र विकासका लागि स्थानीय, प्रान्तीय र संसदीय चुनाव महत्ववपूर्ण छन् । हामी पुरानो विकास साझेदार हुनुका नाताले यहाँको आर्थिक समृद्धि र स्थिरतामा सहयोग जारी राख्नेछौं' उहाँले भन्नुभयो ।