भक्तपुरमा पत्रकारहरुमाथि गरिएको दुर्व्‍यवहारको भर्त्सना

थिमि: मध्यपुर थिमिमा रहेको हुनुमन्ते खोलाको बहाव परिवर्तन गरिएको समाचार संकलनका लागि पुगेका पत्रकारहरुमाथि गरिएको दुर्व्यवहार भएको छ। शनिबार बिहान समाचार तथा फोटो संकलन गर्न पुगेका अनलाइन खबरका फोटो पत्रकार कविन अधिकारी, मिडिया एनपी डटकमका सुदीपकुमार पौडेल, करेन्ट नेपाल डटकमका वर्षा शाह लगायतका पत्रकारहरुमाथि दुर्व्‍यवहार गरिएको हो।

नेपाल पत्रकार महासंघका केन्द्रीय पार्षद् एवम् राष्ट्रिय फोटो पत्रकार समूह (एनएफपिजे), जिल्ला शाखा भक्तपुरका अध्यक्ष तथा राससका फोटो पत्रकार रत्नकृष्ण श्रेष्ठ, नेपाल पत्रकार महासंघका केन्द्रीय पार्षद् एवम् क्रियाशिल पत्रकार मञ्च भक्तपुरका अध्यक्ष तथा एनएफपिजे भक्तपुर शाखाका उपाध्यक्ष रमेश गिरी, नेपाल पत्रकार महासंघ भक्तपुरका सदस्य लिला श्रेष्ठसँग भएको क्यामेरा तथा मोवाइलमा कैद गरिएको फोटो तथा भिडियो डिलेट गर्न धम्की दिनुका साथै पौडेलमाथि हातपातसमेत गरि मोवाइलमा कैद गरिएको फुटेज डिलेट गराएका थिए।

पत्रकारहरुमाथि भएको दुर्व्‍यवहारप्रति राष्ट्रिय फोटो पत्रकार समूह, क्रियाशिल पत्रकार मञ्च, प्रेस चौतारी भक्तपुरले आपत्ति जनाएको छ। उसले दोषीमाथि कडा कारबाहीको माग गरेको छ।