थापागाउँ र गोदावरीमा ‘भुवनेश्वरी यन्त्र' राखिने

काठमाडौं :  ‘भुवनेश्वरी यन्त्र' राखेपछि भूकम्प आउँदैन भन्ने सुन्दा अचम्म लाग्न सक्छ । तान्त्रिक शक्तिबारे जानकार यस्तो तान्त्रिक यन्त्र, मन्त्र र तन्त्रले सिद्ध गरेर राखे भूकम्प नआउनेमा विश्वस्त छन् । भारतका आधा दर्जन प्रमुख ठाउँमा प्रयोगमा आइसकेको भुवनेश्वरी यन्त्र अब राजधानीको थापागाउँ र गोदावरीमा राखिँदैछ । यन्त्र स्थापनापछि आसपासका १५ देखि २० किलोमिटर आसपाससम्म भूकम्प नआउने विश्वास गरिएको छ ।

अखिल भारतीय स्वामी सामाथ्र्य गुरुपीठ त्रयंबकेश्वरबाट आएको टोलीले थापागाउँ सुधार समितिसँगको समन्वयमा थापागाउँस्थित राधाकृष्ण मन्दिर र गोदावरीस्थित फुल्चोकी माई मन्दिरमा भुवनेश्वरी यन्त्र राख्न लागेको हो । गुपीठको विश्वभर ६ हजार केन्द्र रहेको र नेपालको राजधानीमा पनि एउटा केन्द्र खोल्न लागिएको जानकारी दिँदै श्री स्वामी समर्थ सेवा केन्द्र नेपालका संयोजक एवं पूर्वमहासेनानी अभिराज आचार्यले सबै यथार्थ सुझबुझसाथ मन्त्र र तन्त्र सिद्ध गरेर विधिपूर्वक भुवनेश्वरी यन्त्र राख्न लागिएको जानकारी दिनुभयो ।

यन्त्र स्थापनाका लागि राधाकृष्ण मन्दिरमा बिहानैदेखि पूजा भइरहेको छ भने गोदावरीमा भोलिदेखि हुनेछ । यन्त्र स्थापनाका लागि गणेश यज्ञ, रुद्री र वैदिक पारायणको काम भइरहेको हो ।

गुरुपीठअन्तर्गत ज्योतिष, वास्तु, आयुर्वेद, कृषि, बालसंस्कार, युवा प्रवद्र्धन, कानुन अभिमुखीकरण, महिला सशक्तीकरण, वेद संशोधन तथा यज्ञ, युवा स्वरोजगारलगायत ११ वटा विभाग छन् । यन्त्र स्थापनाको काम वेद संशोधन तथा यज्ञ विभागअन्तर्गत भइरहेको हो । उहाँले शुक्रबार अन्नपूर्णसँग भन्नुभयो, ‘वैदिक र तान्त्रिक विधिबाट ज्योतिष र विज्ञान समेतका आधारमा यन्त्र स्थापना गरेपछि प्राणप्रतिष्ठा हुनेछ, यसपछि दैनिक पूजाआजा हुन्छ भने वर्षमा एकपटक जागरण गर्ने काम हुनेछ ।'

काठमाडौं आएका गुरुपीठका देश तथा विदेश प्रमुख पराग झाले मन्त्र र यन्त्र सिद्ध गरी भुवनेश्वरी यन्त्रलाई विराजमान गरेपछि भूकम्प नआउने दाबी गर्नुभयो । ‘पशुमाथि जब क्रूर ढंगले अत्याचार हुन्छ र हत्याहरू हुन्छन्, अझ गौहत्या हुन्छ तब भूकम्प आउँछ', उहाँले भन्नुभयो, ‘भारतको उडिसामा भुवनेश्वरी माताको मन्दिर छ, माताको यन्त्रमा नियमित पूजा हुन्छ, यसमा धेरै देवीदेवताको मन्त्रोच्चारण पनि गरिन्छ । यसरी विराजमाग गराएर विधिपूर्वक काम गर्दा भूकम्प आउँदैन ।'

अखिल भारतीय स्वामी सामाथ्र्य गुरुपीठ त्रयंबकेश्वरबाट आएको टोलीले थापागाउँ सुधार समितिसँगको समन्वयमा थापागाउँस्थित राधाकृष्ण मन्दिर र गोदावरीस्थित फुल्चोकी माई मन्दिरमा भुवनेश्वरी यन्त्र राख्न लागेको हो ।

उहाँले भूकम्प कुनै कारणले आइहाले पनि मानव र पशु कसैको पनि क्षति नहुने दाबी गर्नुभयो । उहाँका अनुसार भारतको गुजरातको भूज, मध्यप्रदेश, जम्बू, बैंङलोर र देहरादूनमा यस्तो भूवनेश्वरी यन्त्र राखिएको छ । उहाँले थप्नुभयो, ‘भुवनेश्वरी यन्त्र राखिएको एक महिनापछि जम्बू आसपास क्षेत्रमा भूकम्प आयो तर जम्बूमा आएन ।' तर, यन्त्र स्थापना गर्दा सबै विधिविधान गर्नु र मिल्नुपर्ने हुन्छ । भारतीय गुरु मौली आन्नासाहेब मोरेले गरेको तान्त्रिक विधिबाट गरे भूकम्प नआउने उहाँको भनाइ छ । गुरुको निधन भइसकेको छ ।

गोदावरीमा १ महिनाअघि यज्ञ गरिसकिएको छ । थापागाउँ सुधार समितिका अध्यक्ष दिपक थापाका अनुसार, फूलचोकी माइमा एक महिनाअघि यज्ञ, बालसंस्कार, ज्योतिष र वास्तुको सेवा १५ सयभन्दा बढीलाई प्रदान गरिएको छ भने बिहीबारमात्रै सोही ठाउँमा चण्डी र गणेश यज्ञ गरिएको छ । उहाँले भन्नुभयो, ‘शनिबार गोदावरी र थापागाउँमा भुवनेश्वरी यन्त्र स्थापना हुँदै छ ।'

पशुपति क्षेत्र विकास कोषका सदस्यसचिव डा. गोविन्द टण्डनले आफूलाई विश्वास नलाग्ने बताउनुभयो । सम्पदा उत्खनन गर्दा आजसम्म कुनै कहीँ-कतै त्यस्तो यन्त्र फेला नपरेको बरु निर्माणमा गुणस्तरीयता खोज्नु सही हुने तर्क उहाँले गर्नुभयो । तान्त्रिक विषयमा दक्खल राख्ने नेपाल संस्कृत विश्वविद्यालयका पूर्वउपकुलपति सहप्राध्यापक विदुर पौडेलले भुवनेश्वरी तन्त्रबारे संस्कृत र अन्य भाषामा पनि कृति प्रकाशन भएको र तिनमा लेखिएअनुसार सम्पूर्ण विधिविधानले निरन्तर लामो साधनाका साथ मन्त्र र तन्त्र सिद्ध हुनेगरी काम गरे संभव हुने जानकारी दिनुभयो ।

थापागाउँ र गोदावरीमा स्थापना गर्न लागिएको सन्दर्भ कति गहन हो, सोबारे आफू अनभिज्ञ भएको बताउँदै थप्नुभयो, ‘युद्धमा तन्त्र र मन्त्र सिद्ध हुँदा पर्शुरामले गणेशको दाँत भाँचेको सबैले थाहा पाएकै कुरो हो । तान्त्रिक शक्तिले मरेको मान्छे पनि बचाउन सकिन्छ भन्नेमा ममा एक इन्च पनि शंका छैन ।'