उम्मेदवारकै नाम मतदाता नामावलीमा नभेटिएपछि...

दमक: कबिराज राईले स्थानीय तहको निर्वाचनमा ज्येष्ठ २० गते झापाको शिबसताक्षी नगरपालिकाको वडा नम्बर ११ बाट मजदुरहरुको साझा उम्मेद्धारको रुपमा स्वतन्त्र प्यानल बाट वडा अध्यक्षको रुपमा उम्मेद्धारी घोषणा गर्नुभयो ।

जेठ २१ गते बाट चुनावी अभियानमा पनि होमिनु भयो तर आफ्नो मतदाता नामवलीमा नाम नभेटेपछि मताधिकारका साथै उम्मेद्धारीबाट बञ्चित हुनु भएको छ । निर्वाचन आयोगको लापरबाहीका कारण राई उम्मेद्धार हुनबाट बञ्चित हुनु भएको हो । राई आफैले निर्वाचन आयोगको कार्यलय भद्रपुरमा गएर फोटो सहितको मतदाता नामावलीमा आफ्नो नाम दर्ता गराउनु भएको थियो ।

तर, निर्वाचन आयोगको लापरबाहीले उहाँको नाम छुटेपछि अहिले आफ्नो चुनावी अभियान समेत रोकेर न्यायको खोजीमा लाग्नु भएको छ । राईसंग २०७३ साल मंसिर ७ गतेको मितिमा दर्ता गराएको मतदाता नम्बर १९५०५३३५ को अर्धकटि रसिद पनि साथै रहेको छ । उम्मेद्धार राईले निर्वाचन आयोगको यसप्रकारको लापारबाही प्रति आक्रोश पोख्नुभयो ।

उहाले भन्नुभयो– ‘निर्वाचन आयोगको कार्यालय धाईरहेको छु,मेरो बिषयमा सबै कुरा भेरीफाई समेत भईसक्यो तर अब मतदाता नामावलीमै नाम नभेटिएपछि आयोगले केहि गर्न नसक्ने ग्रैह जिम्मेवारीपूर्ण अभिब्यक्ति दिन्छ । मैले जसरी हुन्छ मतको अधिकार प्रयोग गर्न पाउनुपर्छ ।’ आफुले निर्वाचनकै लागि भनेर प्रचार प्रसार गरिसकेको र अब उम्मेद्धारकै नाम आयोगको लापारबाहीले मतदाता नामावलीमा नभेट्दा ईज्जतमा धक्का लागेको उहाँले बताउनुभयो ।

यस बिषयमा निर्वाचन आयोगका अधिकृत गोपाल आचार्यसँगसंग बुझ्दा उहाँले गल्ति भएको स्वीकार गर्नुभयो । नामावलीमा नाम नआउनुमा दुईतिरबाट नामदर्ता गरेको हुनुपर्ने वा नाम सारेको हुन सक्ने उहाँले बताउनुभयो । उहाँले राईको बिषयमा दुबै नभएको देखिएको समेत बताउनुभयो । आर्चायले भन्नुभयो–‘उहाँको बिषयमा हामीले यहाबाट गर्ने भेरीफाई सबै गरिसक्यौ । तर पनि छुटेकै दखियो । यसका लागि हामीले केही गर्न सक्ने अवस्था छैन ।’ आचार्यका अनुसार झापामा मात्रै यस्ता एक दर्जन नाम रहेको जानकारी दिनुभयो ।

झापामा मात्र नभएर अन्य जिल्लामा समेत यस्ता गुनासोहरु आईरहेको उहाको भनाई छ । केन्द्रमा समेत यसका बिषयमा कुराकानी गरेको बताउदै उहाँले अब यसको कुनै उपचार नरहेको बताउनुभयो । प्राविधिक कारण त्रुटि भएको बताउदै उहाँले यस बिषयमा दुखी रहेको प्रतिक्रिया दिनुभयो ।