अपहरण शैलीमा महिला बेपत्ता

बर्दिया :  बर्दियाको बढैयाताल गाउँपालिका वडा नम्वर २ जमुनी फुटाहा निवासी २९ बर्षीया एक महिला बेपत्ता छिन् । मिलमा जान हिँडेकी सविता पाण्डे शुक्रबार मध्यान्ह साढे १२ बजे देखि अपहरण शैलीमा वेपत्ता परेकी हुन्।

आसन्न स्थानीय तह निर्वाचन गेरुवा गाउँपालिका वडा नम्वर २ मा नेपाली काँग्रेसका तर्फबाट वडा अध्यक्ष पदका उम्मेदवार विनु प्रसाद पाण्डेकी भाई बुहारी सविता तमौलीपुर गाउँस्थित कासीराम पौडेलको घरमा साइकल राखेर मिल गएको पारिवारिक श्रोतले जनाएको छ ।

फुटाहाका लेखेन्द्र पाण्डेकी धर्मपत्नी सवितासँग शुक्रबार बेलुकी ५ः४१ बजे मोबाइलमा कुरा भएको दिदी सासु निर्मला मैनालीले बताउनु भयो । ‘बुहारीले आफै फोन गरेर भनेकी छिन्, कोठामा एउटी लाटी महिलासँग राखेर बाहिरबाट ताला लगाएको र स्थान थाहा छैन्' उहाँले भन्नुभयो ।

सविताले फोनमा बताए अनुसार अपहरणकारीले पूर्व पश्चिम महेन्द्र राजमार्ग अन्र्तगत बाँकेको ढकेरी सम्म बेहोस बनाएर मोटरसाइकलमा लगेको र ब्युतिएर भाग्न खोज्दा पुन बेहोस बनाएर गाडीमा चढाएर लगेका हुन् । अपहरणकारीले परिवारसँग नत फिरौती मागेका छन् नत सवितालाई कुटपिट नै गरेका छन् । मैनालीले थप्नुभयो-‘हामीले खोजबिनको लागि प्रहरीलाई खवबर गरेका छौं तर अहिले सम्म बहारीको अवस्था अज्ञात नै छ ।' अपहरण शैलीमा लैजाने व्यक्तिकोबारेमा पनि केही जानकारी आएको छैन ।

प्रमुख जिल्ला अधिकारी बिष्णुबहादुर थापाका अनुसार सविता पाण्डेको खोजी गर्न व्यापक सुरक्षाकर्मी परिचालन गरिएको छ । घटनाकाबारेमा गहन छानबिन भइरहेको उहाँले बताउनु भयो । ‘हामीले घटनालाई सुस्मरुपमा अध्ययन र अनुसन्धान गरिरहेका छौं' । प्रजिअ थापाले अगाडी भन्नुभयो मोवबाइल ट्रयाकिङ्ग गर्दा पीडित अहिले बुटवलमा भएको पत्ता लागेको छ ।

घटना अपहरण हो वा होइन भन्ने बारेमा व्यापक अनुसन्धान भइरहेको बताउँदै छिट्टै घटनाको वास्तविक सत्यतथ्य बाहिर आउने थापाले विश्वास दिलाउनु भयो ।
अज्ञात समूहले महिलालाई बेपत्ता पारेको भन्ने खवर आएकाले व्यापक खोजी कार्य भइरहेको जिल्ला प्रहरी कार्यालय बर्दियाका प्रहरी उपरीक्षक भरत बहादुर बोहोराले बताउनु भयो । कसले किन कसरी महिला वेपत्ता भएको भन्ने सम्बन्धमा अनुसन्धान भइरहेको उहाँले प्रष्ट पार्नुभयो ।