निर्वाचन कानून र आयोगको छिट्टै व्यवस्था हुन्छ: प्रधानमन्त्री देउवा
साउन १, २०७४ आइतबार १८:५६:०
काठमाडौँ : सरकारले प्रदेशसभा र प्रतिनिधिसभा निर्वाचन कानून निर्माण र निर्वाचन क्षेत्र निर्धारण आयोग अब छिट्टै गठन हुने जानकारी दिएको छ ।
प्रधानमन्त्री शेरबहादुर देउवाले निर्वाचन आयोगका पदाधिकारीलाई निर्वाचन क्षेत्र निर्धारण आयोग गठन र कानुन निर्माण अब चाँडै हुने भएकाले निर्वाचनका लागि तयारी अवस्थामा रहन अाइतवार निर्देशन दिनुभएको हो ।
प्रधानमन्त्री देउवालाई भेट्न प्रमुख निर्वाचन आयुक्त डा अयोधीप्रसाद यादवसहितको आयोगको टोली आज अपराह्न प्रधानमन्त्री तथा मन्त्रिपरिषद्को कार्यालय, सिंहदरबार पुगेको थियो । भेटमा सहभागी गृहमन्त्री जनार्दन शर्माले आयोगका पदाधिकारीसँग खासगरी निर्वाचनका लागि आवश्यक कानून र निर्वाचन क्षेत्र निर्धारण आयोगका विषयमा केन्द्रित रहेर छलफल भएको जानकारी दिनुभयो ।
मतदाता नामावली संकलनको अवधि र स्थानीय तहमा पुगेर मतदाता नामावली दर्ता गर्न सकिन्छ वा सकिँदैन भन्नेबारेमा पनि उहाँहरुबीच छलफल भएको थियो ।
प्रमुख आयुक्त डा अयोधीप्रसाद यादवले प्रदेशसभा र प्रतिनिधिसभा निर्वाचनका लागि आवश्यक पूर्वाधारका रुपमा रहेका कानून र निर्वाचन क्षेत्र निर्धारण आयोग गठनका विषयमा छलफल भएको बताउनुभयो । निर्वाचनका लागि आवश्यक कानून र निर्वाचन क्षेत्र निर्धारण आयोग अविलम्ब गठनका लागि माग गरिएको जानकारी दिँदै उहाँले निर्वाचन कानून र निर्वाचन क्षेत्र निर्धारण आयोगको गठन गरी त्यसको प्रतिवेदन चाँडै पाउनुपर्ने आयोगको माग रहेकाे बताउनुभयाे ।
निर्वाचन क्षेत्र निर्धारण आयोग छिट्टै गठन हुने तथा निर्वाचन आयोगको मागअनुरुपको कानून पनि दु्रतमार्गबाट पारित हुने कुरा सरकारका तर्फबाट विश्वास दिलाइएको प्रमुख निर्वाचन आयुक्त यादवले जानकारी दिनुभयो ।
यसैबीच, आयोगले मतदाता नामावली संकलन गर्न दिएको समयावधिभित्र जिल्ला निर्वाचन कार्यालयमा पुगेर समय र स्थानको भरपूररुपमा सदुपयोग गर्न सबैसँग आग्रह गरेको छ ।
निर्वाचन आयोगले अाइतवारदेखि यही साउन १५ गतेसम्म प्रदेशसभा र प्रतिनिधिसभा निर्वाचनको प्रयोगका लागि प्रत्येक जिल्ला निर्वाचन कार्यालयमा फोटोसहितको मतदाता नामावलीमा नाम दर्ता गर्न सक्ने व्यवस्था मिलाएको छ । रासस
प्रतिक्रिया दिनुहोस !
