मनोनयनकै दिन गठबन्धन भत्कियो
राजविराज : संघीय समाजवादी फोरमका अध्यक्ष उपेन्द्र यादवको उम्मेदवारीविरुद्ध राजपाका नेता विद्रोही उम्मेदवार बनेपछि राजपा-फोरमको गठबन्धन भत्किएको छ । राजपाका सहमहामन्त्री जयप्रकाश ठाकुरले फोरम अध्यक्ष यादवविरुद्ध प्रतिनिनि सभा २ बाट उम्मेदवारी दिएपछि संशकित बनेको फोरमका नेताहरुले समेत राजपालाई छुट्याएको सबैजसो क्षेत्रबाट स्वतन्त्र उम्मेदवारी दिएका छन् ।
आगामी मंसिर २१ गते हुने निर्वाचनका लागि सप्तरीमा राजपा र फोरमको गठबन्धनबीच प्रतिनिधि सभामा २-२ र प्रदेश सभामा क्रमशः ५-३ सिट बाँडफाँड गर्ने सहमति भएको थियो । सहमतिअनुरुप फोरमले प्रतिनिधि सभा १ र २ तथा प्रदेश सभामा क्षेत्र नम्बर २ को १, क्षेत्र नम्बर ४ को १ र २ मा चित्त बुझाएको थियो ।
मोरगं र सुनसरीबाट यसअघि निर्वाचित हुँदै आएका फोरम अध्यक्ष यादवले सुरक्षित क्षेत्र खोज्दै सप्तरी २ मा उम्मेदवारी दिएपछि चुनावको तयारी गरिरहेका राजपाका सहमहामन्त्री ठाकुरले असन्तुष्टि जनाउँदै स्वतन्त्रबाट उम्मेदवारी दिए ।
गत संविधानसभाको निर्वाचनमा समेत तेस्रो बढी मत ल्याउन सफल ठाकुरलाई मधेस आन्दोलटनमा निरन्तर सक्रिय रहेपछि प्रभावशाली उम्मेदवारका रुपमा हेरिन्छ । आफ्नो क्षेत्रको प्रदेश सभा १ मा धर्मनारायण राय र २ मा राजपाका अर्का प्रभावशाली नेता लक्ष्मण यादवसँग टिम बनाएर उम्मेदवारी दिएपछि ठाकुरलाई बलियो उम्मेदवार मानिन्छ । नयाँ शक्तिबाट मनोनयन दर्ता गराए पनि राय राजपाका पुराना नेता हुन् तथा मनोनयन दर्ता गर्न उनी ठाकुर र लक्ष्मण यादवकै समूहमा नाराजुलुससहित आएका थिए ।
गठबन्धनको सहमतिअनुसार प्रदेशसभा १ मा फोरमका केन्द्रीय सदस्य शैलेन्द्रप्रसाद साह र प्रदेशसभा २ मा राजपाका महासचिव मनिष सुमनले उम्मेदवारी दिएका छन् । राजपाका सुमनविरुद्ध उनकै पार्टीका लक्ष्मण यादवले उम्मेदवारी दिएकोमा फोरमले समेत राजविराज नगर प्रमुखमा निकटतम प्रतिद्वन्द्वी रहेका भिमराज यादवलाई स्वतन्त्रबाट उम्मेदवार बनाएको छ ।
क्षेत्र नम्बर ३ को प्रदेशसभा १ मा राजपाका दिनेश यादवविरुद्ध फोरमका उमेशप्रसाद यादव तथा क्षेत्र नम्बर ३ को प्रदेशसभा २ मा राजपाका बिदेश्वर यादवविरुद्ध फोरमका उपेन्द्रप्रसाद साह र जवाहरलाल यादवले स्वतन्त्रबाट उम्मेदवारी दिएका छन् ।
क्षेत्र नम्बर ४ बाट प्रतिनिधिसभाका लागि फोरमका केन्द्रीय सदस्य अनिरुद्धकुमार सिंह यादवले गठबन्धनबाट टिकट पाएका राजपाका उपाध्यक्ष मृगेन्द्रकुमार सिंह यादवविरुद्ध स्वतन्त्र उम्मेदवारी दिएका छन् । राजपाका उपाध्यक्ष नवलकिशोर साहले क्षेत्र नम्बर १ को प्रदेशसभा २ बाट दिएको उम्मेदवारीविरुद्ध फोरमका प्रदेश समितिका सचिव शम्भु झा स्वतन्त्रबाट उम्मेदवार बनेका छन् । काँग्रेस परित्याग गरेका चन्द्रकान्त चौधरीले राजपाबाट उम्मेदवारी पाएपछि राजपाका मुनीलाल खंगले प्रतिनिधि सभा ३ बाट स्वतन्त्र उम्मेदवारी दिएका छन् ।
यसैगरी प्रतिनिधिसभा १ मा फोरमका डा. सुर्यनारायण यादवले गठबन्धनबाट उम्मेदवारी दिएकोमा उनी विरुद्ध राजपाका बिनोदकुमारले मनोनयन दर्ता गराएका छन् ।
प्रतिक्रिया दिनुहोस !
