‘चालक पनि कति अप्ठ्यारा
सरको घर कता पर्यो ?
गुल्मी जिल्ला धुकोर्ट गाविस।
जागिर खानुभएको कति भयो ?
ट्राफिक भएर काम गर्न थालेको दुई वर्षजति भयो।
यसअघि के गर्नुहुन्थ्यो ?
ब्याचलर्स पढ्दै थिएँ।
पढाइ कहाँ पुग्यो नि ?
अहिले पोलिटिकल साइन्समा मास्टर्स गर्दैछु।
फोर्समा कसरी आउनुभयो ?
ट्राफिक प्रहरीको ड्रेस अत्यन्त राम्रो लाग्थ्यो। अर्को कुरा, काठमाडौँमा ट्राफिक समस्या देखेर ट्राफिक प्रहरी बनेर केही गर्नुपर्छ भन्ने सोचले यतातिर डोर्यायो।
कामबाट कत्तिको सन्तुष्ट हुनुहुन्छ ?
काठमाडौँको सडकमा धुलोधुवाँ, साँघुरा बाटा, लेन अनुशासनलगायत अनेक समस्या छन्। तैपनि काम गर्दा सन्तुष्ट त हुनैपर्यो।
काम गर्न कत्तिको गाह्रो छ ?
जुन निकायले काम गर्नुपर्ने हो त्यसले समयमै नगर्ने। सडकमा जताततै खाल्डाखुल्डी र मर्मत–सम्भारको काम भइरहने हुँदा ट्राफिक व्यवस्थापन गर्न गाह्रो हुन्छ।
राति पनि काम गर्नुपर्छ ?
राति ७ बजेदेखि १० बजेसम्म ड्युटी पर्छ। कहिलेकाहीँ साढे ८ देखि १२ बजेसम्म पनि खट्नुपर्ने हुन्छ। जाडोमा चाहिँ राति काम गर्न गाह्रै हुन्छ।
पढाइ र कामका लागि कसरी समय मिलाउनुहुन्छ ?
कामले गर्दा कलेज नियमित गइँदैन। फुर्सदमा किताब पढ्छु। परीक्षा फारम भर्यो, परीक्षा दियो। यसरी नै मिलाएको छु।
यता कता बस्नुहुन्छ?
यहाँ अफिसमै बस्ने गर्छु।
चालक र ट्राफिकको सम्बन्ध कस्तो हुन्छ ?
चालक पनि फरक–फरक छन्। कोही नियममा गाडी चलाउँछन्, कोही अप्ठ्यारा पनि हुन्छन्। सम्झाइबुझाइ गरेर पठाउनुपर्छ। आफूले राम्रो व्यवहार गर्नुपर्छ।
ड्युटीमा के–के गर्नुहुन्छ ?
चोक–चोकमा पुग्ने, जाम भएको बेलामा जाम खुलाउने, दुर्घटना परेको बेलामा घाइतेको उद्धारमा खटिने, सबैलाई ट्राफिक नियम पालना गर्न सहयोग गर्ने...यस्तै–यस्तै काम त हुन् !
सडकको अस्तव्यस्तता हटाउन कसले के गर्नुपर्ला ?
सबैले सचेत हुनुपर्छ, ट्राफिक नियम सबैले मान्नुपर्छ। सडक बनाउने काममा सबै क्षेत्र मिलेर समन्वय गर्नुपर्छ। सडकको जिम्मा सबैले लिनुप¥यो। सडक सबैको हो भन्ने भावना आउनुपर्छ।
फुर्सदमा के गर्नुहुन्छ ?
पत्रपत्रिका पढ्छु। कहिलेकाहीँ फिल्म हेर्न गइन्छ।
प्रस्तुतिः अजवी
प्रतिक्रिया दिनुहोस !
