काठमाडौँः नेकपा एमालेका सचिव प्रदीप ज्ञवालीले आफ्नो पार्टीका अध्यक्ष केपी शर्मा ओली प्रधानमन्त्री बनेलगत्तै भारतीय प्रधानमन्त्री नरेन्द्र मोदी नेपाल भ्रमणमा आउने खुलासा गरेका छन् ।
आइतबार रिपोर्टर्स क्लब नेपालले गरेको साक्षात्कारमा नेता ज्ञवालीले भारतीय विदेशमन्त्री सुष्मा स्वराजको नेपाल भ्रमणपछि दुई देशको सम्बन्ध थप सुमधुर भएको दाबी गर्दै एमाले अध्यक्ष केपी ओली प्रधानमन्त्री बनेलगत्तै मोदी नेपाल भ्रमणमा आउने बताए ।
स्वराजको नेपाल भ्रमणअघि नै ओली र भारतीय प्रधानमन्त्री नरेन्द्र मोदीबीचको टेलिफोन वार्तामा दुवै पक्षले एक–अर्कालाई भ्रमणको निम्तो दिएकाले सोही अनुसार मोदी नेपाल आउने ज्ञवालीले बताए ।
साक्षात्कारमा बोल्दै उनले वाम गठबन्धनले भारतसँग सुमधुर सम्बन्ध राखेर जान चाहेको सुनाए । ‘जसरी मोदीले ओलीलाई दुईपटक फोन गर्नुभयो’, उनले भने, ‘उहाँ स्वराज नेपाल भ्रमण आएर अविश्वास हटाउनुभयो ।’
ओलीले मोदीलाई जनकपुर र मुक्तिनाथको भ्रमण रोकिएको स्मरण गराउँदै नेपाल भ्रमणको निम्तो दिएको पनि ज्ञवालीले बताए । नेपाल–भारत द्विपक्षीयसम्बन्ध सुधार भएको उनको विश्वास छ । ज्ञवालीले भारतीय विदेशमन्त्री सुष्मा स्वराजको नेपाल भ्रमणले दुई देशबीचको सम्बन्धमा भएको अविश्वास हटेको दाबी गरेका हुन् ।
स्वराजको भ्रमण भारत सरकारको रुचिअनुसार भएको दाबी गर्दै ज्ञवालीले अनावश्यक टिकाटिप्पणी गर्न उचित नभएको जिकिर गरे । ‘वामपन्थीको बहुमत आएपछि बधाई दिँदै नयाँ सरकार गठनपछि सहकार्य गरौँ भन्न स्वराज आउनुभएको हो’, उनले भने, ‘नयाँ सरकारसँग सहकार्य गर्नका लागि वातावरण बनोस् भन्ने भारतको चाहना हो ।’
विगतमा नेपालमा नयाँ सरकार बन्ने बेलामा नेपालकै नेताहरु भारत दौडिने गरेकोमा अहिले भारतका मन्त्री नेपाल आउनु सकारात्मक भएको उनले बताए । ‘पहिला पहिला नेपालमा सरकार बन्ने बेला नेपालका नेताहरु दौडेर भारत जाने परम्परा थियो । यो गलत परम्परा तोडिएको छ’, ज्ञवालीले भने ।
स्वराजको भ्रमणलाई सहज रुपमा लिनुपर्नेमा नकारात्मक टिप्पणी गरिएकोप्रति ज्ञवालीले आक्रोश पोखे । ‘कतिपयले हिनताबोध र कुण्ठा व्यक्त गरेका छन्’, उनले भने, ‘यो आवश्यक छैन’ उनले भने ।
संविधान जारीपछिको नीतिमा भारतले पुनरावलोकन गर्न चाहेको संकेत पाइएको ज्ञवालीको भनाई छ । यद्यपि पछिल्लो समय नेपाल–भारतबीचको अविश्वास हटे पनि आगामी दिनमा कस्तो हुन्छ भन्ने ठोकुवा गर्न नसकिने ज्ञवालीको भनाई छ ।
‘अब समस्या आउँदैन भनेर ठोकुवा गर्न सकिने अवस्था छैन । कहिले अदुवा, कहिले चिया, कहिले कुचो निर्यातमा अवरोध भैरहेको छ । यसले नेपालको व्यापार घाटा बढाएको छ’ उनले भने ।
बेला–बेलामा सिमा विवाद हुने गरेको उल्लेख गर्दै ज्ञवालीले नयाँ नक्साअनुसार सिमानामा पिल्लर बनाउनुपर्ने बताए । फरक प्रसङ्गमा नेता ज्ञवालीले फागुन महिनाभित्रमा नयाँ सरकार गठन र पार्टी एकता प्रक्रिया टुङ्गोमा पुग्ने दाबी गरे । पछिल्लो समय पार्टी एकता हुँदैन भनेर गरिएको प्रचारप्रति आक्रोशित ज्ञवालीले एकता नचाहनेले गलत हल्ला चलाएको आरोप लगाए ।
प्रतिक्रिया दिनुहोस !
