काठमाडौँः इङ्लिस प्रिमियर लिग अन्तरगत शनिबार राति भएको चर्चित म्यानचेस्टर डर्बी भिडन्तमा म्यानचेस्टर युनाइटेडले म्यानचेस्टर सिटीलाई उसैको घरमा पराजित गरेको छ ।
सिटीको यो सिजनको उपाधि जित्ने आशालाई एक खेल पर धकेल्दै युनाइटेडले दुई गोलले पछि परेको अवस्था उल्ट्याउँदै ३–२ को जित दर्ता गराएको हो ।
युनाइटेडको जितमा फ्रान्सेले मिडफिल्डर पउल पोग्बा नायक सावित भए । उनले युनाइटेड दुई गोलले पछि परेको अवस्था उल्ट्याउँदै डेढ मिनेटभित्र दुई गोल गरे । युनाइटेडका लागि अर्को गोल हेडमार्फत डिफेन्डर क्रिस स्मालिङले गरे ।
पराजित सिटीका लागि खेलको २५ औँ मिनेटमा कप्तान भिन्सेन कोम्पनीले हेडबाट गोल गरे । त्यसपछि गुन्दोगानले ३१ औँ मिनेटमा गोल गर्दै सिटीलाई २–० को अवस्थामा पुर्याए ।
पहिलो हाफमा २ गोल खाएको युनाइटेडका लागि पोग्बाले दोस्रो हाफमा २ गोल गरे । उसका लागि पोग्बाले ५३ औँ र ५५ मिनेटमा गोल गरे भने स्मालिङले ६९ मिनेटमा निर्णायक गोल गरे ।
यो जितपछि युनाइटेड ३२ खेलबाट ६८ अंकसहित लिगको दोस्रो स्थानमा छ । पराजित सिटी भने ८७ अंकसहित लिगको पहिलो स्थानमा छ । आजको खेल गुमाएको उसले उपाधि पक्का गर्न अर्को खेलसम्म कुर्नुपर्ने भएको छ ।
प्रतिक्रिया दिनुहोस !
