सप्तरी र उदयपुरबाट सिन्डिकेट पक्षधर ६ जना पक्राउ

मनोहर/भरत

राजविराज/गाईघाटः सप्तरी र उदपयुरबाट ६ जना सिन्डिकेपक्षधर यातायात व्यवसायी पक्राउ परेका छन् । सप्तरीबाट सगरमाथा यातायात संघका सचिव दिनेश साह, सदस्यहरु दिनेश गुप्ता र गजेन्द्र भगतलाई प्रहरीले पक्राउ गरेको हो । उनीहरुलाई यातायात संघको राजविराजस्थित कार्यालयबाट पक्राउ गरिएको हो ।

सिन्डिकेट कायम राख्न माग गर्दै सवारी साधनहरु ग्यारेजमा थन्क्याउने र सर्वसाधारणलाई दुःख दिने गरेकाले नियन्त्रणमा लिइएको सप्तरीका एसपी मुकेशकुमार सिंहले बताए ।

सर्वसाधारणको दैनिक जीवनका अत्यावश्यक सेवा क्षेत्रमा बन्द, हडताल गर्न नपाउने भन्दै गृह मन्त्रालयले बैसाख ११ गते जारी गरेको राजपत्रमा यातायात क्षेत्र लगायत १८ सेवामा अत्यावश्यक सेवा ऐन अन्तर्गत हड्ताल र बन्द निषेध क्षेत्र घोषणा गरेको छ । 

अत्यावश्यकीय वस्तुमा हडताल गर्ने व्यवसायीलाई तत्काल पक्राउ गरी सरकारले थुनामा राख्न सक्नेछ भने उनीहरुलाई ६ महिनादेखि पाँच वर्षसम्म जेल सजाय हुन सक्छ ।

प्रहरीहरुले बस तथा माइक्रो काउण्टरमा गई नचल्ने सवारी साधनहरुको नम्बर टिपोट गर्न थालेपछि यहाँस्थित प्रालिका बस र रात्री बस, टेम्पो र म्याजिक चल्न थालेका छन् । दिवा सेवाका सवारी साधन भने दिनभरी चलेनन ।

उदयपुरबाट तीनजना

उदयपुरमा यातायात सिण्डिकेटको विरोध गर्दै सार्वजनिक सवारी बन्द गर्ने ३ जना व्यवसायीलाई शुक्रबार प्रहरीले पक्राउ गरेको छ । 

गृहमन्त्री रामबहादुर थापाले गाडी बन्द गर्ने व्यवसायीलाई पक्राउ गर्न निर्देशन दिएलगत्तै प्रहरीले हिमाली यातायात व्यवसायी संघ उदयपुरका उपाध्यक्ष उमेश बस्नेत, कोषाध्यक्ष बिष्णु श्रेष्ठ र सदस्य शुरेस कार्कीलाई प्रहरीले पक्राउ गरेको हो । 

उनीहरुलाई प्रहरीले गाईघाट बजारबाट पक्राउ गरेको प्रमुख जिल्ला अधिकारी बिष्णुकुमार कार्कीले जानकारी दिए । उनीहरुलाई जिप्रकामा राखिएको छ ।

सिडिओ कार्कीले सार्वजनिक यातायातका साधन बन्द गरी सर्वसाधारणलाई दुःख दिएको अभियोगमा यातायात व्यवसायीलाई पक्राउ गरेको जानकारी दिए । उनीहरुलाई गरिने कारबाहीबारे माथिल्लो तहको निर्देशनपछि मात्र टुंगो गरिने जिल्ला प्रहरी कार्यालयका निमित्त प्रहरी प्रमुख डिएसपी मेघराज अधिकारीले जानकारी दिए ।