च्याम्पियन्स लिग फाइनलका लागि सर्भियन रेफ्री
नियोन : युरोपेली फुटबल महासंघ (यूईएफए) ले यो सिजनको युरोपियन च्याम्पियन्स लिग र युरोपा लिगको फाइनल खेलाउने रेफ्रीको टुंगो लगाएको छ । यूईएफएले रूसमा आयोजना हुने आसन्न २१औं फिफा विश्वकप खेलाउन छनोट भएका दुई रेफ्रीलाई युरोपको दुई ठूला क्लब फुटबलको फाइनल खेलाउने जिम्मेवारी तोकेको हो ।
जसअनुसार सर्भियाका मिलोराड माजिकले इङ्लिस क्लब लिभरपुल र स्पेनी क्लब रियल म्याड्रिडबीचको च्याम्पियन्स लिगको फाइनल खेल खेलाउनेछन् । यस्तै नेदरल्यान्ड्सका बिजोर्न कुईपर्सले स्पेनी क्लब एट्लेटिको म्याड्रिड र फ्रान्सेली क्लब मार्सेलीबीचको युरोपा लिग फाइनल खेल खेलाउनेछन् ।
च्याम्पियन्स लिग फाइनल मे २६ तारिखमा युक्रेनको केइभमा हुनेछ भने युरोपा लिगको फाइनल मे १६ मा फ्रान्सको ल्योनमा हुनेछ । सन् २०१३ मा चेल्सी र बेन्फिकाबीचको खेलसमेत खेलाएका कुइपर्सका लागि यो दोस्रो युरोपा लिगको फाइनल हुनेछ । कुईपर्सले सन् २०१४ को च्याम्पियन्स लिग फाइनल पनि खेलाएका थिए । कुईपर्स र माजिक अर्काे महिनाबाट रूसमा सुरु हुने विश्वकप फुटबलका लागि समेत छनोट भएका रेफ्री हुन् ।
प्रतिक्रिया दिनुहोस !
