काठमाडौँः वरिष्ठ गायक योगेश वैद्यलाई रेडियो अन्नपूर्ण नेपाल ९४ मेघाहर्जले दीर्घ साधना सम्मानमा सम्मानित गरिएको छ ।
मंगलबार काठमाडौँमा आयोजित रेडियो अन्नपूर्ण नेपालको चौथो वार्षिकोत्सव कार्यक्रममा अन्नपूर्ण मिडिया नेट्वर्कका अध्यक्ष क्याप्टेन रामेश्वर थापा र वरिष्ठ गीतकार रत्न शमशेर थापासहितले वैद्यलाई दीर्घ साधना सम्मानबाट सम्मानित गरेका हुन् ।
आधुनिक गीतसंगीतको श्रीवृद्धिमा छ दशक लामो समयदेखि साधनारत वैद्यको निरन्तरको विशिष्ठ साधनाका लागि २५ हजार रुपैयाँसहितको यो सम्मान प्रदान गरिएको हो ।
नेपाली र नेवारी भाषाका चार सयभन्दा बढी गीतमा स्वर भरेका वैद्यले दर्जनौं गीतमा संगीत पनि दिएका छन् । उनले गीतका साथै थुप्रै कविता पनि सिर्जना गरिसकेका छन् ।
सम्मान कार्यक्रममा बोल्दै गायक वैद्यले रेडियो अन्नपूर्णबाट यस्तो सम्मान पाउँदा आफैँलाई देखेर आफू खुसी भएको रोचक प्रतिक्रिया दिए । आफूले सांगीतिक क्षेत्रमा निरन्तर साधना गरेकै कारण यो अवस्थासम्म आइपुगेको बताउँदै वैद्यले यसमा स्रोता र दर्शकको अटुट साथ रहेको पनि स्मरण गरे ।
त्यसैगरी कार्यक्रममा भाषाविद चूडामणि गौतम र वरिष्ठ सञ्चारकर्मी तथा साहित्यसेवी दाहाल यज्ञनिधीलाई पनि सम्मानित गरियो । कार्यक्रममा वरिष्ठ गीतकार रत्न शमशेर थापा, यादव खरेल र वरिष्ठ गायक प्रेमध्वज प्रधान पनि उपस्थित थिए ।
प्रतिक्रिया दिनुहोस !
